काठमाडौं—नेपाल डेन्टल एशोसिएसनले सरकारसँग ओरल मेडिसिन, ओरल प्याथोलोजी, पेडोडोन्टिक्सलगायतका विधामा दरबन्दी सिर्जना गर्न माग गरेको छ । बुधबार स्वास्थ्य मन्त्रालयमा ज्ञापनपत्र बुझाउँदैं एशोसिएसनले उक्त माग गरेको हो ।
उसले ठूलो संख्यामा दक्ष जनशक्ति हुँदाहुँदै पनि सरकारी स्वास्थ्य सेवातर्फ मुख स्वास्थ्यजस्ता संवेदनशील विषयमा आवश्यक दरबन्दी नखुल्दा दन्त चिकित्सकहरु गम्भीर मर्कामा परिरहेको जनाएको छ ।
‘विशेषगरी दन्त्र विशेषज्ञताअन्तर्गत ओरल मेडिसिन, ओरल प्याथोलोजी, पेडोडोन्टिक्स, पब्लिक हेल्थ डेन्टिष्ट्री तथा फरेन्सिक डेन्टिष्ट्रीजस्ता विषयमा हालसम्म एक पनि सरकारी दरबन्दी सिर्जना नभएको अवस्था छ,’ एशोसिएसनले भनेको छ । उसले स्वास्थ्य सेवा ऐन र लोकसेवा आयोगको संरचनामा समेत यी विषयहरु समावेस हुन नसक्नु दुःखद् भनेको छ ।
स्वास्थ्य तथा जनसंख्या मन्त्रालयले संगठन तथा व्यवस्थापन सर्वेक्षणको प्रक्रिया अगाडि बढाएकाले छुटेका दन्त विशेषज्ञ विषयहरु यथाशीघ्र दरबन्दी सिर्जना गर्न एशोसियसनले आग्रह गरेको छ ।
एशोसियसनले आठौं तहका डेन्टल सर्जनहरुको दरबन्दी संख्या वृद्धि गर्न समेत माग गरेको छ ।
