काठमाडौं महानगरपालिकामा बुधबारदेखि क्यान्सरको निःशुल्क परीक्षण

काठमाडौं—काठमाडौं महानगरपालिकाले क्यान्सरको निःशुल्क परीक्षण गर्ने भएको छ । बुधबारदेखि महानगरपालिकाको सहरी स्वास्थ्य प्रवर्द्धन केन्द्रमा हुने निःशुल्क परीक्षण शिविर बैशाख महिनाभर संचालन हुनेछ ।

मंगलबार राष्ट्रिय सभा गृहमा महिला जनप्रतिनिधि र कर्मचारीहरुको निःशुल्क स्वास्थ्य परीक्षण गर्दै महानगरपालिकाले क्यान्सर स्क्रिनिङ शिविरको सुरुवात गरेको थियो । शिविरमा स्तन, पाठेघरको मुखको क्यान्सर र प्रजनन रुग्णता सम्बन्धि निःशुल्क परीक्षण हुनेछ ।

स्वास्थ्य शिविरबाट थप परीक्षणको आवश्यकता भएमा सिभिल सर्विस अस्पतालमा निःशुल्क परीक्षणको व्यवस्था महानगरपालिकाले गरेको छ ।