कोशी अस्पतालबाट भागेका थुनुवा पक्राउ

विराटनगर–विराटनगरस्थित कोशी अस्पतालको आकस्मिक कक्षको शौचालयको भेन्टिलेसनबाट फरार भएका एन जना थुनुवा पक्राउ परेका छन् । मोटरसाइकल चोरी मुद्दामा पक्राउ परेका सुनसरी बुर्ज गाउँपालिका २ का २८ वर्षीय शिवनाथ कामत अस्पतालको शौचालयबाट सोमबार फरार भएका थिए ।

थुनुवा कामत फरार भएपछि प्रहरीले उनको खोजी कार्य तीव्र बनाएको थियो । फरार भएको एक दिनपछि मोरङ प्रहरीले मंगलबार १० बजे विराटनगरको कोचाखालदेखि पक्राउ गरेको मोरङ प्रहरीका डिएसपी मन्जिल मुकारूङले जानकारी दिए ।

४ असोजमा मोटरसाइकल चोरी आरोपमा मोरङ प्रहरीले कामतलाई पक्राउ गरेको थियो । पक्राउ परेका कामत पेट दुख्ने समस्या भएपछि उनलाई पाँच दिन अगाडी कोशी अस्पतालमा भर्ना गरिएको थियो । थुनुवा कामतले शौच आयो भनेपछि उनले प्रहरीलाई झुक्याएर फरार भएका थिए ।

चोरी आरोपमा पक्राउ परेका कामतको प्रहरीले अनुसन्धान पुरा गरी अनुसन्धान प्रतिवेदन जिल्ला सरकारी वकिलको कार्यालय मोरङमा समेत बुझाएको थियो । दशैं विदाले गर्दा अहिले अदालत बन्द रहेको छ । अदालत खुलेलगतै अभियोग लैजाने तयारी गर्दैगर्दा प्रतिवादी कामत अस्पतालको शौचालयबाट फरार भएका थिए ।