विराटनगर -स्वास्थ्य बीमा बोर्डले चौतर्फी विरोध र चर्को आलोचनापछि विराटनगरस्थित कोशी अस्पताललाई पुनः ‘प्रथम सेवा विन्दु’को मान्यता दिएको छ । बुधबार कोशी अस्पताललाई पठाइएको पत्रमार्फत बोर्डले अस्पताललाई पुनः पहिलो उपचार केन्द्र (प्रथम सेवा विन्दु) तथा रिफरल सेन्टरको रूपमा सेवा प्रवाह गर्न अनुमति दिएको छ ।
बोर्डको पछिल्लो निर्णयसँगै बीमितलाई राहत मिल्ने देखिएको छ भने अस्पतालको आम्दानी तथा सेवाप्रवाह प्रणाली यथावत् रहनेछ ।
यसअघि बोर्डले कोशी अस्पताललाई ‘प्रथम सेवा विन्दु’बाट हटाउने निर्णय गरेको थियो । असार १९ गते जारी निर्णयमा संघीय सरकार मातहत रहेका अस्पतालहरूलाई प्राथमिक सेवा केन्द्रको रुपमा नराखी ‘मात्र रिफरल सेन्टर’ बनाउने भनिएको थियो । सो निर्णयअनुसार कोशी अस्पताललाई साउन १ गतेदेखि पहिलो सेवा विन्दुबाट हटाउने तयारी थियो ।
बोर्डको उक्त निर्णय सार्वजनिक भएपछि संघिय सांसद अमनलाल मोदीले प्रतिनिधी सभाको बैठकमा निजी अस्पतालको प्रभावमा परेर सरकारी अस्पताल डुवाउने खेल भएकोको भन्दै बोर्डको निर्णाय सच्याउन माग गरेका थिए । बोर्डको निर्णायबाट विराटनगर र आसपासका नागरिकले उपचारमा सास्ती व्यवहर्ने र अस्पतालको आम्दानी गुम्ने उनको भनाई थियो ।
बोर्डको निर्णाय विरुद्ध स्वास्थ्यकर्मी, अस्पतालका कर्मचारीबाट विरोध भएको थियो । कोशी अस्पतालमा दैनिक सयौं बीमित उपचारका लागि आउने गरेका छन् । त्यसमध्ये विराटनगर महानगर क्षेत्र भित्रका मात्र १ लाख १६ हजार ३६० जना नागरिकले स्वास्थ्य बीमा गरेका छन् । ती सबैले कोशी अस्पतालमा नै प्राथमिक उपचार लिने गरेका छन् ।
बोर्डको निर्णय लागू भएको खण्डमा यी नागरिकहरूले अन्य सेवा विन्दु खोज्नुपर्ने बाध्यता आइपथ्र्यो । यसले उनीहरूलाई आर्थिक, भौगोलिक तथा सेवाको गुणस्तरका दृष्टिले कठिनाइ निम्त्याउने निश्चित थियो । त्यसका साथै कोशी अस्पतालको वार्षिक २० करोड रुपैयाँभन्दा बढी आम्दानी समेत गुम्ने अवस्था थियो ।
कोशी अस्पताल प्रशासनले उक्त निर्णयप्रति आपत्ति जनाउँदै स्वास्थ्य मन्त्रालय तथा बीमा बोर्डलाई पत्रमार्फत निर्णय पुनरावलोकन गर्न माग गरेको थियो । साथै, अस्पतालका चिकित्सक, नर्स, प्रशासनिक कर्मचारी लगायत सबैले निर्णय नसच्याइए कडा आन्दोलनमा जानुपर्ने चेतावनीसमेत दिएका थिए ।
विरोध चर्किएसँगै बोर्डले स्वास्थ्य तथा जनसंख्या मन्त्रालयसँग परामर्श गरी निर्णय पुनरावलोकन गरेको देखिन्छ । मिति २०८१/०३/३२ गते बोर्डले कोशी अस्पताललाई पठाएको औपचारिक पत्रमा भनिएको छ, ‘बीमितहरूको स्वास्थ्य सेवामा सहज पहुँच रहोस् भन्ने उद्देश्यले हाललाई २०८२ साल असार मसान्तसम्मका लागि कोशी अस्पताललाई ‘प्रथम सेवा विन्दु’ तथा ‘रिफरल सेन्टर’को रूपमा सेवा दिन अनुमति दिइएको छ ।’
बोर्डको निर्णयसँगै अब बीमितहरू पुरानै प्रकृयाअनुसार कोशी अस्पतालमा स्वास्थ्य बीमाअन्तर्गत निःशुल्क वा सहुलियतपूर्ण सेवा लिन पाउनेछन् ।
‘स्वास्थ्य बीमा बोर्डको पछिल्लो निर्णय सराहनीय छ । यसले बीमित बिरामीलाई सहजता मिल्नेछ, अस्पतालको सेवा निरन्तर रहन सक्नेछ । हाम्रो माग जनहितमै आधारित थियो, यसलाई सम्बोधन गरेकोमा हामी धन्यवाद दिन चाहन्छौं,’ मेसु डा. रुणा झाले भनिन् ।
