अस्थायी कोभिड अस्पताललाई आधारभूत अस्पतालमा रुपान्तरण गर्ने स्वास्थ्य मन्त्रालयको निर्णय

काठमाडौं– स्वास्थ्य तथा जनसंख्या मन्त्रालयले यस अघि अस्थायी कोभिड अस्पतालको रुपमा सबै स्थानीय निकायमा सञ्चालन गर्ने भनिएको ५ बेडको अस्पताललाई आधारभूत अस्पतालका रुपमा रुपान्तरण गर्ने निर्णय गरेको छ ।

मन्त्रालयले चालू आर्थिक वर्षमा नै तत्काल अस्पताल सञ्चालन गर्ने गरी बजेट निकासा गरिएको स्वास्थ्य तथा जनसंख्या मन्त्रालयका नीति योजना महाशाखाका उप–सचिव तारानाथ लुईंटेलले जानकारी दिए ।

अस्थायी अस्पतालका रुपमा सरकारले अस्पताल नभएका सबै स्थानीय तहमा ५ बेडको कोभिड अस्पताल सञ्चालन गर्ने गरी ३ महिनाका लागि १० लाख रुपैयाँका दरले बजेट निकासा गरेको थियो ।

ती अस्पतालहरुलाई निरन्तरता दिन र स्थायी अस्पतालमा रुपान्तरण नहुन्जेलका लागि अस्पतालको सेवा निरन्तर गर्न र स्वीकृत अस्थायी जनशक्तिको व्यवस्थापन गरी चालू वर्षको तलब भत्ता बापतको रकम माग गर्न स्थानीय निकायलाई सूचना जारी गरेको छ ।