गंगालालको निमित्त निर्देशकमा डा. रवि मल्ल

काठमाडौं—शहीद गंगालाल हृदय रोग केन्द्रको निमित्त निर्देशकमा डा. रवि मल्ल नियुक्त भएका छन् । बुधबार स्वास्थ्य तथा जनसंख्यामन्त्री मोहनबहादुर बस्नेतले उनलाई मन्त्रीस्तरीय निर्णय गर्दै निमित्त निर्देशकको जिम्मेवारी दिएका हुन् ।

६ पुसमा कार्यकारी निर्देशक डा. चन्द्रमणि अधिकारीको कार्यलय सकिएसँगै गंगालाल कार्यकारी प्रमुख पद रिक्त बनेको थियो । त्यसपछि डा. मल्ललाई निमित्त निर्देशकको जिम्मेवारी दिइएको हो ।

‘आजदेखि निमित्त निर्देशकको जिम्मेवारी सम्हालेको छु,’ मल्लले हेल्थआवाजसँग भने । गंगालालका सिनियर कन्सल्ट्यान्ट कार्डियोलोजिष्ट  डा. मल्ल २४ वर्षदेखि त्यहाँ कार्यरत छन् ।

उनी चिकित्सा विज्ञान राष्ट्रिय प्रतिष्ठान (न्याम्स)मा कार्डियोलोजीका प्राध्यापक समेत हुन् ।