काठमाडौं—कुलमान घिसिङ नेतृत्वको उज्यालो नेपाल पार्टीले आफ्नो घोषणापत्र सार्वजनिक गरेको छ । आइतबार सार्वजनिक घोषणापत्रमा स्वास्थ्य सम्बन्धि तीन बुँदे प्रतिबद्धता जनाइएको छ ।
उक्त दलले स्वास्थ्यतर्फको पहिलो बुँदामा निःशुल्क स्वास्थ्य सेवा अभियान राखेको छ । जसअन्तर्गत हरेक नागरिकलाई तोकिएको स्वास्थ्य संस्थामा निःशुल्क उपचारको व्यवस्था गर्ने, कुपोषणबाट ग्रसित महिला तथा बालबालिका केन्द्रित कार्यक्रम सञ्चालन गर्ने र ग्रामीण जनतालाई मोबाइल क्लिनिक र टेलिमेडिसिनको व्यवस्था गर्ने उल्लेख छ ।
दोस्रो बुँदामा मनोसामाजिक परामर्श सेवामा प्रतिबद्धता व्यक्त गरिएको छ । जसअन्तर्गत उक्त पार्टीले प्रत्येक वडामा मानसिक स्वास्थ्य परामर्शदाता सेवा उपलब्ध गराउने व्यवस्था गर्ने उल्लेख गरेको छ ।
यस्तै, तेस्रो बुँदामा प्राथमिक स्वास्थ्य केन्द्रमा विशेषज्ञ सेवा प्रदान गर्ने प्रतिबद्धता छ । जसअन्तर्गत प्रत्येक स्थानीय तहको स्वास्थ्य संस्थामा कम्तिमा एक जना विशेषज्ञ (हाडजोर्नी, स्त्रीरोग र बालरोग) राख्ने व्यवस्था गर्ने जनाइएको छ ।
