काठमाडौं—चितवन जुगेडीस्थित ओम मेगाश्री फर्मास्युटिकल्स लिमिटेडले एक वर्षमा २७ करोड रुपैयाँ बढीको कारोबार गरेको छ । फर्मास्युटिकल्सको फाइनान्सियल तथ्यांकअनुसार सन् २०२५ मा उसले २७ करोड ८० लाख रुपैयाँको कारोबार गरेको हो ।
ओम मेगाश्रीले सन् २०२४ को तुलनामा आर्थिक कारोबार १० करोड बढीले वृद्धि भएको हो । सन् २०२४ मा उसले ८ करोड ७० लाख रुपैयाँको कारोबार गरेको थियो ।
गैरआवासीय नेपालीहरुले प्रवर्द्धन गरिरहेको ओम मेगाश्री फर्मास्युटिकल्स ७ फागुन २०८० बाट औपचारिक रुपमा सञ्चालनमा आएको थियो ।
यो फर्मास्युटिकल्स कम्पनीले २०८१ सालमा आईपीओ समेत ल्याएर आईपीओ ल्याउने पहिलो नेपाली फर्मा कम्पनीका रुपमा आफूलाई उभ्याएको थियो । आंशिक कर्जा घटाउने, आई एण्ड इयर ड्रप प्लान्ट बनाउने, सेफ प्लान्ट र भेट प्लान्ट विस्तार गर्ने योजनाका साथ कम्पनीले आईपीओ ल्याएको थियो ।
ओम मेगाश्रीले कार्डियाक, एन्टी डाइबेटिक गरी ३९ प्रकारका औषधी उत्पादन गर्दै आएको छ । ‘केही समयभित्रै हामी २४ वटा प्रडक्टहरु थप्दैंछौं,’ ओम मेगाश्रीका अध्यक्ष अर्जुनकुमार श्रेष्ठले भने ।
