मस्को—रसियाले क्यान्सरको उपचारमा सम्भावित ठूलो उपलब्धि मानिएको पहिलो व्यक्तिगत क्यान्सर खोप एक मेलानोमा (छालाको क्यान्सर) भएका बिरामीलाई दिएको छ । गत हप्ताको बुधबार रुसी रक्षा स्वास्थ्य मन्त्रालयले विज्ञप्ती जारी गर्दै उक्त जानकारी दिएको हो ।
गत वर्ष मन्त्रालयले दुई वटा रसियामै बनाइएको क्यान्सरका औषधिहरु स्वीकृत गरेको थियोः एडभान्स मेलानोमा लागि एमआरएनए आधारित खोप ‘नियोओनकोभ्याक’ (Neooncovac) र आक्रामक कोलोरेक्टल ट्युमरलाई लक्षित गरेर विकास गरिएको पेप्टाइड उपचार ओनकोपेप्ट (Oncopept) । दुवैको मानव परीक्षण सन् २०२५ मा सुरु भएको थियो ।
औषधि विकासमा संलग्न गामालेया अनुसन्धान संस्थानका वैज्ञानिक निर्देशक अलेक्जान्दर गिन्जबर्गले गत हप्ताको मंगलबार ‘नियोओनकोभ्याक’ पहिलो क्लिनिक ट्रायलका लागि छालाका क्यान्सरको थर्ड स्टेजसँग लडिरहेका ६० वर्षीय पुरुष बिरामीलाई दिइएको छ जानकारी दिए ।
‘अहिलेसम्म उनी राम्रो अवस्थामा छन् । औषधिको कुनै प्रतिकूल असर देखिएको छैन,’ गिन्जवर्गले गत बुधबार Gazeta.ru सँग भने, ‘उनी ६० वर्षका छन् र मेटास्टेसिससहित तेस्रो चरणको मेलानोमा छ । यो खोपले विशेषगरी मेटास्टेसिससँग मद्धत गर्छ ।’
बिरामीको ट्युमर र गैर—ट्युमर ट्स्युबाट नमुना लिइएको थियो र अनुसन्धानकर्ताहरुले जीनोम विश्लेषण गरेर व्यक्तिगत खोप तयार गरेका थिए, जसले प्रतिरक्षा प्रणालीलाई क्यान्सर कोषहरुमाथि आक्रमण गर्न ‘प्रशिक्षण’ दिन्छ ।
रुसी स्वास्थ्य मन्त्रालयअन्तर्गत राष्ट्रिय रेडियोलोजी अनुसन्धन केन्द्रका प्रमुख आन्द्रेई काप्रिनकाअनुसार यो उपचार विधि पूर्ण रुपमा नयाँ दृष्टिकोण हो । ‘यो आधारभूत रुपमा फरक दृष्टिकोण हो—केवल रोगको उपचार गर्ने होइन् तर जोखिमपूर्ण कोषहरुलाई चिनेर नष्ट गर्न प्रतिरक्षा प्रणालीलाई प्रशिक्षित गर्ने हो,’ उनले भने ।
बिरामीलाई २—३ हप्ताको अन्तरालमा ८—९ मात्रा दिइनेछ र प्रत्येक सुईपछि उनको प्रतिरक्षा प्रतिक्रिया मापन गरिनेछ । उपचारको तीन महिनापछि नतिजा अपेक्षित छ ।
पूर्व—क्लिनिकल (जनावरमा गरिएको) परीक्षणहरुले धेरै अवस्थामा ट्युमर हराएको देखाएको थियो र करिब ९० प्रतिशत परीषणमा मेटास्टेसिसले सकारात्मक प्रतिक्रिया दिएको गिन्जवर्गले यसअघि बताएका थिए ।
स्वास्थ्यमन्त्री मिखाइल मुराश्कोकाअनुसार ‘नियोओनकोभ्याक’ हाल रुसको राष्ट्रिय स्वास्थ्य बीमा प्रणालीअन्तगृत निःशुल्क उपचारका रुपमा उपलब्ध गराउने अन्तिम चरणमा छ ।
पहिलो दर्ता गरिएको कोभिड—१९ खोप स्पुतनिक भी बनाएको गामालेया केन्द्रले अन्य क्यान्सरहरु जस्तैः प्यानक्रियाटिक, मिर्गौला र नन—स्मल सेल फोक्सो क्यान्सरका लागि पनि औषधि विकास गरिरहेको छ, जुन विश्वभर उच्च मृत्युदर भएका क्यान्सरहरुमध्येमा पर्दछन् ।
-आरटीबाट भावानुवाद
