काठमाडौं—सुदूरपश्चिमको एकमात्र रिफरल अस्पतालको रुपमा रहेको सेती प्रादेशिक अस्पताल संघीय सरकार मातहतमा ल्याउने प्रक्रियामा ढिलाइ भएको छ । सुदूरपश्चिम सरकारले सेती अस्पताललाई संघमा हस्तान्तरण गर्ने निर्णय गरेको लामो समय बितिसक्दा पनि अर्थको स्वीकृत नपाउँदा संघ मातहतमा आउन ढिलाइ भएको हो ।
स्वास्थ्य तथा जनसंख्या मन्त्रालयको नीति, योजना तथा अनुगमन महाशाखा प्रमुख डा. कृष्ण पौडेलले सेती प्रादेशिक अस्पताललाई संघ मातहतमा ल्याउने विषयमा खासै प्रगति नभएको बताए । ‘हामीले राय मागेर अर्थमा प्रस्ताव पठाएका हौं,’ उनले भने, ‘तर, अर्थले यस विषयमा धेरै प्रश्नहरु सोधेको छ । यसमा खासै प्रगति भएको छैन ।’
०७९ मा सुदूरपश्चिम प्रदेश सरकारले सेती प्रादेशिक अस्पताललाई केन्द्रीय अस्पताल बनाउने प्रक्रिया अगाडि बढाउन केन्द्र सरकारलाई प्रस्ताव गरेको थियो । त्यतिबेला तीन सय शय्या बनाएर संघ मातहतमा ल्याउन प्रदेश सरकारले प्रधानमन्त्री तथा मन्त्रिपरिषद्को कार्यलयलाई पत्राचार गरेको थियो । प्रधानमन्त्री कार्यालयले ३ सय शैय्यामा स्तरोन्नती गरी केन्द्रीय अस्पताल बनाउने प्रक्रिया अगाडि बढाउन स्वास्थ्य तथा जनसंख्या मन्त्रालयलाई निर्देशन दिएको छ ।
उक्त निर्देशनपछि स्वास्थ्यले सेतीलाई तीन सय शय्याको अस्पतालमा स्तरोन्नती गरेर संघीय अस्पताल बनाउने गरी अर्थको राय मागेर प्रस्ताव पठाएको थियो । त्यसपछि अर्थले सेती अस्पताललाई स्तरोन्नती गरेर संघीय अस्पताल बनाउने स्वास्थ्यको प्रस्तावमा विभिन्न प्रश्न सोधेको थियो । जसको उत्तर स्वास्थ्यले अहिलेसम्म अर्थलाई पठाएको छैन ।
सुदूरपश्चिम प्रदेशको प्रादेशिक रिफरल अस्पतालसमेत रहेको सो अस्पताललाई केन्द्रीय अस्पताल बनाइए सो प्रदेशमा तीन वटा केन्द्रीय अस्पताल हुनेछन् । हाल डडेलधुरा अस्पताल र शहीद दशरथ चन्द स्वास्थ्य विज्ञान विश्वविद्यालय शिक्षण अस्पताल गेटालाई केन्द्रीय अस्पताल मातहतमा नै राखिएको छ ।
