वीरेन्द्रनगर—सुर्खेतका नौ वटै स्थानीय तहका २४ हजार किशोरीलाई (ह्युमन प्यापिलोमा भाइरस) एचपीभी विरुद्धको खोप लगाइने भएको छ । खोप अभियान आगामी माघ २२ गते विश्व क्यान्सर दिवसको अवसर पारेर सुरु गर्ने तयारी छ ।
विद्यालयमा अध्ययनरत कक्षा ६ देखि १० सम्मका किशोरीलाई उक्त खोप दिइनेछ भने विद्यालयमा अध्ययन नगर्ने १० वर्षदेखि १४ वर्षसम्मका किशोरीलाई पनि खोप लगाइने जिल्ला जनस्वास्थ्य कार्यालयका फोकल पर्सन धनबहादुर बुढाले बताए । ‘माघ २२ गतेदेखि नौ वटै स्थानीय तहमा रहेका १६० वटा स्वास्थ्य संस्थामा एकैसाथ खोप अभियान सुरू गर्छौं’, उनले भने, ‘यो अभियान फागुन ७ गते समापन हुनेछ ।’
अहिले स्वास्थ्य संस्थाका इन्चार्जहरूलाई तालिम दिने कार्य भइरहेको उनको भनाइ छ । ‘अहिले दुई—दुई पालिका गरेर स्वास्थ्य संस्थाका इन्चार्जहरूलाई दुई दिने तालिम दिइरहेका छौं’, उनले भने, ‘त्यसपछि उहाँहरूले आफ्नो कार्यक्षेत्रमा गएर अन्य स्वास्थ्यकर्मीलाई तालिम दिने र खोप अभियान सुरू गर्ने तयारी हामीले गरेका छौं ।’
नेपालमा पाठेघरको मुखको क्यान्सरबाट हरेक दिन चार जना महिलाको मृत्यु हुने गरेको र नेपालमा महिलाहरूमा हुने क्यान्सरमध्ये पाठेघरको मुखको क्यान्सर दोस्रो मुख्य कारण रहेको छ । तर, महिलाको मृत्यु हुनेमा भने यो रोग पहिलो मुख्य कारण देखिएको छ ।
