नेपाल औषधी उत्पादक संघका मागबारे छलफल, समाधानको निम्ति समिति गठन

काठमाडौं- नेपाल औषधी उत्पादक संघको समस्या समाधान गर्न स्वास्थ्य तथा जनसंख्या मन्त्रालयले समिति गठन गरेको छ। आइतबार स्वास्थ्य मन्त्री भानुभक्त ढकालको उपस्थिति र मन्त्रालयको गुणस्तर मापन तथा नियमन महाशाखाका प्रमुख डा विकास देवकोटाको संयोजकत्वमा संघका मागबारे छलफल गरी हल गर्नको निम्ति समिति गठन भएको हो ।

सो समितिमा औषधी व्यवस्था विभागका महानिर्देशक नारायण ढकाल र नेपाल औषधी उत्पादक संघका अध्यक्ष नारायणबहादुर क्षेत्री सदस्य रहेका छन्।

बैठकमा संघले आफ्नो समस्या र माग राख्नुको साथै पहिलो चरणको वार्ता सकिएको समितिका संयोजक डा. देवकोटाले बताए। उनका अनुसार सोमबार बैठकमा बाँकी छलफल हुनेछ।

संघले एक साता देखि स्यानिटाइजरको दर्ताको लागि सरकारले ३ महिना म्याद थपेकोमा विरोध जनाउँदै औषधी व्यवस्था विभागमा आन्दोलन गर्दै आएको छ । स्यानेटाइजरमा नेपाली औषधी उधोग आत्मनिर्भर भईसकेको हुदा बिना दर्ता र गुणस्तर परिक्षण बिक्रि गर्न दिने निर्णय फिर्ता गराउन धर्ना बसेको हो ।