कोरोनाबाट चिनियाँ व्यापारीसहित २ जनाको मृत्यु

काठमाडौं—कोरोना संक्रमणबाट चिनियाँ व्यापारीसहित २ जनाको मृत्यु भएको छ । स्वास्थ्य तथा जनसंख्या मन्त्रालयकाअनुसार मृत्यु हुनेमा १ वर्षदेखि पोखरामा व्यापार गरेर बसिरहेकी ४९ वर्षीया चिनियाँ महिलाको बुधबार त्रिवि शिक्षण अस्पतालमा मृत्यु भएको हो ।

मिर्गौला तथा मुटुमा समस्या भएर पोखरामा मणिपाल अस्पतालमा भर्ना भएर थप उपचारका लागि २ साउनमा उनलाई काठमाडौंको ग्राण्डी अस्पतालमा ल्याइएको थियो । सो अस्पतालमा परीक्षण गर्दा कोरोना पोजेटिभ देखिएपछि थप उपचारका लागि शिक्षण अस्पताल ल्याइएको थियो । शिक्षणमा उपचारकै क्रममा उनको मृत्यु भएको मन्त्रालयका प्रवक्ता डा. जागेश्वर गौतमले जानकारी दिए ।

यस्तै, खोकी, उच्च ज्वरो र श्वासप्रश्वासमा समस्या भएर २ साउनमा विपी कोइराला स्वास्थ्य विज्ञान प्रतिष्ठान धरानमा भार्न भएका धनुषाको जनकपुर उपमहानगरपालिकाका ६० वर्षीय पुरुषको पनि मृत्यु भएको छ ।

भेन्टिलेटरमा राखेर सघन उपचार भैरहेका बेला ६ साउनमा उनको मृत्यु भएको मन्त्रालयले पुष्टि गरेको हो । उनको मृत्यु कारणका पनि कोरोना नै रहेको मन्त्रालयले पुष्टि गरेको छ ।