डक्टर्स सोसाइटी अफ नेपाल र योङ्ग डक्टर्स एसोसियसनद्वारा स्वास्थ्य शिविर संचालन

काठमाडौं–डक्टर्स सोसाइटी अफ नेपाल र योङ्ग डक्टर्स एसोसियसनले संयुक्त रुपमा काठमाडौंमा स्वास्थ्य शिविर सञ्चालन गरेका छन् । शुक्रबार बानेश्वरस्थित रत्नराज्य माध्यमिक विद्यालयमा शिविर सञ्चालन गरिएको हो । दुई दिने सो शिविरको पहिलो दिन शुक्रबार स्वास्थ्य परामर्श तथा सामान्य उपचार प्रदान गरिएको थियो । शिविरको अन्तिम दिन शनिवार रक्तदान कार्यक्रम आयोजना गरिने भएको छ ।

भरोसा हस्पिटल प्रा.लि. र लायन्स क्लब काठमाडौ–ग्रिनसिटीको सह–प्रायोजन रहेको सो शिविरमा विद्यार्थी र अभिभावकलाई दाँतको सरसफाई, पोषण, फोहोर व्यवस्थापनलगायतका विषयमा सचेतना दिइएको थियो ।

शिविरमा परिवार नियोजन र महिनावारीको विषयमा अभिभावकलाई जानकारी गराइनुका साथै स्त्रीरोग, बालरोग, रक्तचाप, तथा नाक–कान–घाँटीको उपचार गरिएको थियो ।