वीर अस्पतालले ल्यायो कोभिड-१९का बिरामीका लागि टेलि कन्सलटेशन सेवा

काठमाडौँ – कोभिड -१९ का बिरामीका लागि कोभिड युनिफाइड केन्द्रीय अस्पताल (वीर अस्पताल)ले टेलि कन्सलटेशन सेवा संचालनमा ल्याएको छ । स्वास्थ्य मन्त्रालयसँग समन्वय गरी वीरले उक्त सेवा बिहिबारबाट संचालन गरेको हो ।

अस्पतालका निमित्त कार्यकारी अधिकारी डा. भुपेन्द्रकुमार बस्नेत र विश्व स्वास्थ्य संगठन (डव्लुएचओ)को नेपालका लागि देशीय प्रतिनिधि डा. राजेश सम्भाजीराव पाण्डवले सेवाको सुरुवात भएको घोषणा गरेका थिए।

सो सेवा संचालनमा विश्व स्वास्थ्य संगठनको आर्थिक तथा प्राविधिक सहयोग रहेको छ ।

यसअघि स्वास्थ्य तथा जनसंख्या मन्त्रालयको स्वास्थ्य आपतकालिन तथा विपत व्यवस्थापन एकाई (एचईओसी)बाट टेलि कन्सलटेशन सेवा संचालनमा थियो। अस्पतालका अनुसार ११३३ नम्बरको हटलाइनबाट २४ घण्टा नै सेवाको सुविधा लिन सकिनेछ।

उनले कोभिड सम्वन्धी सबै सेवाहरु आवश्यक परे विशेषज्ञ समेतको सहयोगमा चौविसै घण्टा लिन सकिने बताए । कोभिडको विषयमा चिकित्सकीय परामर्श लिन सकिनेछ।