सुर्खेतमा क्यान्सरका बिरामी बढे

सुर्खेत – सुर्खेतमा क्यान्सरका बिरामी बढेका छन् । चालु आर्थिक वर्षमा विगतमा भन्दा क्यान्सरका बिरामी बढेका हुन् ।

चालु आर्थिक वर्ष २०७९/८० मा हालसम्म जिल्लामा दुई सय ३८ जना क्यान्सरका बिरामी देखिएको जनस्वास्थ्य सेवा कार्यालय सुर्खेतले जनाएको छ ।

सुर्खेतका नौ वटै स्थानीय तहमा क्यान्सरका बिरामी भेटिएको जिल्ला जनस्वास्थ्य सेवा कार्यालयले जनाएको छ । यो वर्ष वीरेन्द्रनगर नगरपालिकाबाट क्यान्सरका ३६ जना बिरामीले सहुलियतका लागि सिफारिस लिएका छन् । लेकबेसी नगरपालिकाबाट यो वर्ष ३० जना क्यान्सरका बिरामीले उपचारका लागि सिफारिस लिएका छन् ।

उपचारमा सहुलियत पाउन थालेपछि क्यान्सरका बिरामीहरू खुल्न थालेको कर्णाली प्रदेश अस्पतालका कन्सल्टेन्ट फिजिसियन डा. केएन पौडेलले बताए । ‘परीक्षण गरिएकोमा दैनिक रुपमा ३/४ जना क्यान्सरका बिरामी भेटिने गरेको छन् ।’ उनले भने,‘अस्पतालमा आएका झन्डै ३० प्रतिशत महिला र २० प्रतिशत पुरुषमा समस्या देखिने गरेको छ ।’