सचिवलाई चिठी लेखेर तलबभत्ता माग्दा पनि नदिएपछि १९ पुसदेखि सेवा नदिने चिकित्सकहरुको चेतावनी

काठमाडौं—सिन्धुली अस्पतालका चिकित्सकहरुले दशैंदेखि तलब सुविधा र भत्ता नपाएपछि नियमित सेवा बन्द गर्ने चेतावनी दिएका छन् । ११ पुसमा अस्पतालमा मेडिकल सुपरिटेन्डेन्टलाई पत्र लेख्दैं उनीहरुले आफूहरुको गुजारा चलाउन समेत गाह्रो भएको भन्दैं तत्काल तलब भत्ता भुक्तानी नभए १९ पुसदेखि सबै सेवाहरु बन्द गर्ने चेतावनी दिएका हुन् ।

अस्पतालमा कार्यरत १२ जना चिकित्सक र एक जना स्वास्थ्यकर्मीले दशैं तिहारको चाडवाड खर्च र हालसम्मको पारिश्रमिक नभएको उल्लेख गरेका छन् । उनीहरुले उक्त पारिश्रमिक र चाडवाड खर्च उपलब्ध गराउनका लागि १८ पुसम्मको अल्टिमेटम दिएका छन् ।

यसअघि अस्पतालमा कार्यरत चिकित्सकहरुले २९ मंसिरमा स्वास्थ्य सचिवलाई पत्र लेखेर आफूहरुको पारिश्रमिक र दशैंको तबलभत्ता माग गरेका थिए । उक्त पत्र स्वास्थ्य सेवा विभाग टेकु र बागमती प्रदेशको स्वास्थ्य मन्त्रालय हेटौडालाई पनि बोधार्थ दिइएको थियो ।

तर, स्वास्थ्य सचिव र अन्य सरोकारवाला निकायहरु चिकित्सक र स्वास्थ्यकर्मीका मागप्रति उदासीन भएपछि उनीहरुले १८ पुसम्म तलबभत्ता भुक्तानी नभए १९ पुसबाट सेवा बन्द गर्ने अल्टिमेटम दिएका हुन् ।