काठमाडौं—स्वास्थ्य तथा जनसंख्या मन्त्रालयले आयुर्वेद काउन्सिलको अध्यक्षमा डा. श्याममणि अधिकारीलाई नियुक्त गरेको छ । मंगलबार स्वास्थ्य तथा जनसंख्यामन्त्री प्रदीप पौडेलले मन्त्रीस्तरीय निर्णय गर्दै डा. अधिकारीलाई काउन्सिलको अध्यक्षमा नियुक्त गरेका हुन् ।
‘आयुर्वेद काउन्सिल र नरदेवीमा नियुक्तिहरु भएका छन्,’ मन्त्रालयका प्रवक्ता डा. प्रकाश बुढाथोकीले भने, ‘काउन्सिलको अध्यक्षमा डा. श्याममणि अधिकारी र नरदेवीको प्रमुखमा डा. वासुदेव उपाध्यायलाई नियुक्त गरिएको छ ।’
डा. अधिकारी आयुर्वेद विज्ञका रुपमा चिनिन्छन् । यस्तै, काउन्सिलमा अन्य सदस्यहरु पनि नियुक्त भएको प्रवक्ता डा. बुढाथोकीले जानकारी दिए ।
यस्तै, मन्त्री पौडेलले नरदेवी अस्पतालको प्रमुखमा डा. वासुदेव उपाध्यायलाई नियुक्ति गरेका छन् । लुम्बिनीका स्वास्थ्य सचिव पनि भइसकेका डा. उपाध्याय ११ औं तहका चिकित्सक हुन् ।
यसअघि नरदेवीको निमित्त प्रमुख डा. रामवेद यादव थिए ।
यसैगरी, मन्त्री पौडेलले लामो समयपछि राष्ट्रिय आयुर्वेद अनुसन्धान तथा तालिम केन्द्रको नेतृत्व पनि परिवर्तन गरेका छन् । डा. रामआधार यादवलाई मन्त्रालयमा ल्याएर उनले केन्द्रमा डा. सन्तोष कुमार ठाकुरलाई पठाएका छन् ।
