काठमाडौं—२ अर्ब ४५ करोडभन्दा बढी लागतमा जनकपुरमा २०० शय्याको विशिष्टीकृत विनयतारा क्यान्सर अस्पताल बन्ने भएको छ । विनयतारा क्यान्सर ट्रष्टले जनकपुर उपमहानगरपालिका—२५ मा २ अर्ब ४५ करोड ५२ लाख ८५ हजार २ सय ६२ रुपैयाँ लागतमा २०० शय्याको क्यान्सर अस्पताल बनाउन लागेको हो ।
वन तथा वातावरण मन्त्रालयमा बुझाइएको अस्पतालको वातावरणीय प्रभाव मुल्यांकन (ईआई) प्रतिवेदनअनुसार ३ विगाहा १३ कठ्ठा ११.५ धुर जग्गामा उक्त अस्पताल निर्माण हुनेछ । अस्पतालका लागि एक बेसमेन्ट एक भुँइतलाबाहेक चार तला भवन निर्माण हुनेछ । अहिले ट्रष्टले २५ शय्याको अस्पताल सञ्चालन गरिरहेको छ ।
अस्पतालमा मेडिकल अंकोलोजी, अंकोलोजी सर्जरी, मेडिकल अंकोलोजी, इन्टरनल मेडिसिन, ग्यास्ट्रो अंकोलोजी, हेड एण्ड नेक अंकोलोजी, एनेस्थेसिया, रेडियोलोजी, प्याथोलोजी, ग्यास्ट्रोलोजी, ग्यास्ट्रोइन्टेरो सर्जरी, क्रिटिकल केयर र एनेस्थेसियोलोजी, पल्मोनरी क्रिटिकल केयर र स्लिप मेडिसिन, इन्टरभेनसनल रेडियोलोजी एण्ड इमेजिङ, मोलीक्युलर बायोकेमेष्ट्री, इम्युनोप्याथोलोली, मोलीक्यूलर प्याथोलोजी, हेमाटोप्याथोलोजी, वर्न सर्जरी, जेनेटिक मेडिसिनलगायतका विशिष्टीकृत सेवा हरनेछन् ।
अस्पतालले बहिरंग सेवा ३०० सय दिनेछ भने इमर्जेन्सी सेवा ३६५ नै दिनेछ । अस्पतालमा ३०६ जनाले रोजगारी पाउनेछन् । जसमध्ये सुशासन र व्यवस्थापनमा २१ जना, क्लिनिकल सेवामा जनशक्ति २६४ जना र अस्पताल सहयोग सेवामा २१ जना जनशक्ति रहने प्रतिवेदनमा उल्लेख छ ।
३६ महिनामा निर्माण सम्पन्न गर्ने लक्ष्य राखिएको उक्त अस्पतालमा बनेमा स्वास्थ्य सेवामा पहुँच वृद्धि हुने, रोजगारीका अवसर सिर्जना हुने र स्वास्थ्य पर्यटनमा वृद्धि हुनेजस्ता सकारात्मक असर पर्ने प्रतिवेदनमा छ ।
