काठमाडौं—शहीद गंगालाल हृदय केन्द्रका वरिष्ठ कन्सल्ट्यान्ट कार्डियाक सर्जन डा. रामेश कोइरालाले राजीनामा दिएका छन् । बुधबार उनले ३० असोजबाट लागु हुने गरी राजीनामा दिएको पत्र सामाजिक सञ्जाल एक्समार्फत सार्वजनिक गरेका छन् ।
‘३० असोज २०८२ देखि लागु हुने गरी मेरो राजीनामा स्वीकृत गरी संचालक समितिलाई समेत अवगत गराइदिनुहुन अुनरोध छ,’ डा. रामेशले कार्यकारी निर्देशक डा. रवि मल्ललाई लेखेको राजीनामा पत्रमा छ । उनले अहिलेसम्म सो अवधिसम्म आफूले उपयोग गर्दै आएको कार्यकक्षमा आफ्ना व्यक्तिगत सामान तथा कागजातबाहेक केन्द्रका कुनै जरुरी र गोप्य कागजात नरहेकाले हस्तान्तरणसम्म पर्खिदिन पनि अनुरोध गरेका छन् ।
राजीनामा दिएको घोषणा गरिरहँदा उनले फेसबुकमा अमेरिका पुगेको पारिवारिक तस्विरसमेत सार्वजनिक गरेका छन् । जसमा उनले लेखेका छन्, ‘देश, पेशा, जीवन र भूमिका सब अब फरक ।’ तर, त्यहाँ उनले अमेरिकामै बस्ने वा नेपालमा फर्कने भन्ने स्पष्ट खुलाएका छैनन् ।
डा. रामेशले पछिल्लो समय चार प्रतिष्ठानको उपकुलपति खाली रहँदा पोखरा स्वास्थ्य विज्ञान प्रतिष्ठान र विपी कोइराला स्वास्थ्य विज्ञान प्रतिष्ठानको उपकुलपति पदका लागि आवेदन दिएका थिए । विपी प्रतिष्ठानको उपकुलपतिका लागि उनी सर्टलिष्टमा समेत परेका थिए । तर, अन्तमा नेपाली कांग्रेसको भागमा परेको उक्त प्रतिष्ठानको उपकुलपतिमा डा. विक्रमप्रसाद श्रेष्ठले बाजी मारेका थिए ।
लामो समयदेखि नेपालको विकृत राजनीतिक प्रणालीलगायतका विषयमा डा. रामेशले ट्वीरलगायतका सामाजिक सञ्जालमार्फत चर्को असन्तुष्टि पोख्दै आएका थिए ।
