काठमाडौं—प्रधानमन्त्री सुशीला कार्कीले पारिश्रमिकको विषयलाई लिएर आन्दोलनरल नर्सहरुको समस्या तत्काल सम्बोधन गर्न निर्देशन दिएकी छन् । बिहीबार स्वास्थ्य सचिव डा. विकास देवकोटालाई बोलाएर स्वास्थ्य मन्त्रालयको नेतृत्वसमेत सम्हालेकी उनले आन्दोलनरत नर्सको समस्या तत्काल समाधान गर्न निर्देशन दिएकी हुन् ।
प्रधानमन्त्री कार्यलय स्रोतकाअनुसार प्रधानमन्त्री कार्कीले नर्स र आवासीय चिकित्सकहरुको पारिश्रमिकका विषयमा स्वास्थ्य सचिवसँग चासो व्यक्त गर्दै तत्काल समस्या समाधानमा लाग्न निर्देशन दिएकी हुन् । उनले दक्ष स्वास्थ्यकर्मीलाई न्यून पारिश्रमिक काम लगाएका विदेश पलायन हुने जोखिम रहेको भन्दैं चिन्ता समेत व्यक्त गरेकी थिइन् ।
न्यून तलबमा काममा लगाएको भन्दैं पोखरास्थित मणिपाल मेडिकल कलेज र गण्डकी मेडिकल कलेजका नर्सहरु आन्दोलनमा छन् । उनीहरुले स्वास्थ्य मन्त्रालयले निर्धारण गरेको न्यूनतम तलब सरकारी पाँचौं तहसरहको मासिक ३४ हजार ७३० रुपैयाँ पारिश्रमिक पाउनुपर्ने माग गरिरहेका छन् । यस्तै, आवासीय चिकित्सकहरुको तलब भुक्तानीका विषयमा पनि अझै केही निजी मेडिकल कलेजहरुमा समस्या रहेको बताइएको छ ।
२४ असोजमा स्वास्थ्य तथा जनसंख्या मन्त्रालयले एक परिपत्र जारी गर्दै निजी अस्पताल तथा मेडिकल कलेजहरुलाई चिकित्सक, नर्स तथा स्वास्थ्यकर्मीहरुको पारिश्रमिक तथा सेवा सुविधा सरकारीसरह बनाउन निर्देशन दिएको थियो । उक्त निर्देशनपछि २७ असोजमा निजी मेडिकल कलेज सञ्चालकहरुको संस्थाले स्वास्थ्य सचिवलाई पत्र लेखेर उक्त निर्देशन लागु गर्न नसक्ने जनाएको हो ।
