सुत्केरीको मृत्युपछि किष्ट अस्पताल तनावग्रस्त, बिरामीका आफन्तले ढुंगामुढा गरेपछि प्रहरीद्वारा लाठी चार्ज

काठमाडौं—उपचारका क्रममा सुत्केरी मृत्यु भएपछि ललितपुरको इमाडोलस्थित किष्ट अस्पताल तनावग्रस्त भएको छ । अस्पतालको लापरवाहीका कारण ३४ वर्षीया सुत्केरी मीनाश्री राईको मृत्यु भएको भन्दैं बिरामीका आफन्तले प्रदर्शन गरिरहेका छन् ।

अस्पतालले प्रहरी गुहारेपछि सोमबार विहानदेखि नै प्रहरीले अस्पताललाई सुरक्षा दिइरहेको थियो । तर, दिउँसोतिर बिरामीका आफन्तहरु आक्रोशित भएर अस्पताल परिसर र प्रहरीमाथि ढुंगामुढा गरेपछि अवस्था तनावग्रस्त बनेको हो । प्रदर्शनकारीहरुले अस्पतालको गेटमा तोडफोड गर्ने प्रयास गरेका छन् ।

प्रहरीले स्थिती नियन्त्रणमा लिन लाठी चार्ज र अश्रुग्यास प्रहार गरेको छ । सो क्रममा केही घाइते भएको अस्पताल प्रशासनले जनाएको छ ।
गत शुक्रबार सुत्केरी गराउने क्रममा खोटाङ हलेसी तुवाचुङ नगरपालिका—९ की  राईको मृत्यु भएको थियो ।

बिरामीको मृत्युपछि आफन्तले क्षतिपूर्तिको माग गरिरहेका छन् । क्षतिपूर्तिका विषयमा अस्पताल र बिरामी पक्षबीच सहमति हुन सकेको छैन ।