स्वास्थ्य सेवा विभागका महानिर्देशक डा. टंक बाराकोटीले दिए राजीनामा

काठमाडौं—स्वास्थ्य सेवा विभागका महानिर्देशक डा. टंक बाराकोटीले राजीनामा दिएका छन् । शुक्रबार स्वास्थ्यका १२ औं तहका अतिरिक्त सचिव डा. बाराकोटीले स्वास्थ्य मन्त्री डा. सुधा शर्मामार्फत प्रधानमन्त्री कार्यालयलाई पठाएका हुन् ।

‘मैले आइतबारदेखि लागु हुने गरी पदबाट राजीनामा दिएको छु,’ उनले हेल्थआवाजसँग भने, ‘आफ्नै स्वास्थ्यका कारण मैले जिम्मेवारीबाट अलग हुने निर्णय गरेको हुँ ।’

डा. बाराकोटी १ चैतमा स्वास्थ्य सेवा विभागको महानिर्देशक बनेका थिए । उनले ९ महिना स्वास्थ्य सेवा विभागको महानिर्देशक हुँदा विवादित निर्णय गरेनन् । उनको कार्यकाल अझै दुई वर्ष बाँकी थियो ।

झापाका स्थानीय वासिन्दा उनले लामो समय मेची अस्पतालमा सेवामा बिताएका थिए ।