काठमाडौं—राष्ट्रिय प्रजातन्त्र पार्टी (राप्रपा)ले आसन्न निर्वाचनका लागि सार्वजनिक गरेको संकल्प पत्रमा औषधीको मुल्य निर्धारण संयन्त्र बनाउनेदेखि सात वटै प्रदेशमा वीर अस्पतालका स्तरको अस्पताल निर्माण गने योजना अगाडि सारेको छ । ४ फागुनमा राप्रका अध्यक्ष राजेन्द्र लिङदेनसहितका नेताहरुले सार्वजनिक गरेको संकल्प प्रस्तावमा सो कुरा उल्लेख गरिएको छ ।
राप्रयाले आधारभूत स्वास्थ्य सेवा सबै नागरिकलाई निःशुल्क र अनिवार्य उपलब्ध गराउने, जेष्ठ नागरिक र अशक्तको घरमै आधारभूत स्वास्थ्य सेवा दिने, सबै नागरिकलाई बीमाको दायरामा ल्याउने, बीमा भुक्तानीमा देखिएको समस्या व्यवस्थापन गर्ने, औषधीको मुल्य निर्धारण संयन्त्र प्रभावकारी बनाए औषधी सस्तो र सुलभ बनाउने संकल्प गरेको छ ।
यस्तै, औषधी उधोगलाई आत्मनिर्भर बनाउने, नेपाललाई उच्चस्तरीय स्वास्थ्य सेवा गुणस्तरीय शिक्षा प्रदान गर्ने क्षेत्री हब बनाउने, आधुनिक अस्पताल, अनुसन्धान केन्द्र र उच्चस्तरीय स्वास्थ्य पूर्वाधार विस्तार गरी नागरिकलाई गुणस्तरीय उपचार उपलब्ध गराउने, क्यान्सर, मिर्गौला तथा मेरुदण्ड रोगबाट पीडित नागरिकलाई दिइने आर्थिक सहायताको व्यवस्थालाई अझ सुदृढ र प्रभावकारी बनाउने, डायलाइसिस सेवालाई थप प्रभावकारी बनाउने संकल्पमा छ ।
राप्रपाले स्वास्थ्य क्षेत्रमा लगानी वृद्धि गर्दै स्वास्थ्य सेवालाई दिगो र गुणस्तरीय बनाउने, आयुर्वेद, प्राकृतिक योग तथा अन्य चिकित्सा पद्धतिको विकास र विस्तार गर्ने, सबै प्रकारको औषधीको गुणस्तर नियन्त्रण गर्ने, वीर अस्पताल स्तरको अस्पताल सातै प्रदेशमा निर्माण गरी सञ्चालन गर्ने र वडा स्वास्थ्य केन्द्रमार्फत वडाका प्रत्येक नागरिकको स्वास्थ्य प्रोफाईल तयार गर्ने संकल्प पत्रमा उल्लेख गरेको छ ।
