काठमाडौं—स्वास्थ्य तथा जनसंख्या, खानेपानी मन्त्री निशा मेहताले सम्पत्ति ३० तोला सुन १७ लाख रुपैयाँभन्दा बढी बैंकमा नगद रहेको पाइएको छ । आइतबार प्रधानमन्त्री तथा मन्त्रिपरिषद् कार्यालयले सार्वजनिक गरेको मन्त्रीहरुको सम्पत्ति विवरणमा मेहतासँग ३० तोला सुन ५० तोला चाँदी र एउटा हिराको औठी रहेको देखिन्छ ।
सुन, चाँदी र हिराको गहनाको स्रोत दाइजो, उपहार र किनेको भनेर उनले सम्पत्ति विरणमा उल्लेख गरेकी छन् ।
यसैगरी, मन्त्री मेहतासँग माछापुच्छ्रे बैंकमा ७ लाख २३ हजार ५३५ रुपैयाँ र सानिमा बैंकमा १० लाख रुपैयाँ नगद मौज्दात रहेको सम्पत्ति विवरणमा उल्लेख गरेकी छन् । जुन मौज्दातको स्रोत तलब रहेको उनले बताएकी छन् ।
स्वास्थ्यमन्त्रीसँग काठमाडौंको सौंखेलमा ७ आना जग्गा रहेको छ भने महोत्तरीको बल्वामा ससुरा सुरेन्द्रप्रसाद सिंह र सासु गंगादेवीको नाममा ८ विगाहा जग्गा रहेको छ । काठमाडौंको जग्गा उनले श्रीमान र आफ्नो तबल तथा ऋणबाट किनेको विवरण पेश गरेकी छन् ।
उनीसँग ग्राण्ड आई१० गाडीसमेत छन् । जुन उनले श्रीमान र आफ्नो तलबबाट किनेको उल्लेख गरेकी छन् । त्यसबाहेक उनीसँग केही कम्पनीहरुको सेयरसमेत रहेको छ ।
