चरिकोट—दोलखामा आँखा शिविरमार्फत सयौं बिरामीले सहुलियतमा शल्यक्रिया सेवा पाएका छन् । तीन दिनसम्म सञ्चालित आँखा शिविरमा दोलखा, रामेछाप र सिन्धुपाल्चोकका आँखाका बिरामीहरूले समेत उपचार सुविधा लिएका हुन् ।
तिलगंगा आँखा प्रतिष्ठान काठमाडौं, लायन्स क्लब अफ दोलखा र दोलखा लायन्स आँखा केन्द्र दोलखाको संयुक्त आयोजनामा सम्पन्न शिविरमा मोतिबिन्दु र आँखामा मासु पलाएका बिरामीको शल्यक्रिया गरिएको हो ।
आयोजकले दोलखाको गाउँ—गाउँमा आँखा शिविर गरी आँखाका बिरामी संकलन गरेका थिए । आँखा शल्यक्रिया गर्नुअघि स्थलगत रुपमा एक हजार २७७ जना आँखा रोगका बिरामी छनोट भएका थिए ।
छनोट भएका आँखा रोगका बिरामीमध्ये ५८ जना मोतिबिन्दु, ६ जना मासु पलाएको, ५९ जनाको क्याट्रक, ३ जनाको पेरिजीयम, ५५ जनाको फेको, ९० जनाको सिक्सको शल्यक्रिया गरेको आयोजकले जानकारी दिए । प्रतिष्ठानका वरिष्ठ नेत्रविशेषज्ञ डा. सुष्मा दुवालको नेतृत्वमा डा. विष्णुहरि मुराहटसहितको टोलीले शल्यक्रिया सम्पन्न गरेको लायन्स आँखा केन्द्र दोलखाका इन्चार्ज विप्लव खड्काले जानकारी दिए ।
उनकाअनुसार फेको प्रविधिबाट गरिएको शल्यक्रियाको शुल्क ८ हजार २ सय रुपैयाँ तोकिएको थियो भने आँखामा मासु पलाएको शल्यक्रियाको शुल्क ५ हजार रुपैयाँ निर्धारण गरिएको थियो । यद्यपि, हातबाट गरिने अपरेशन भने पूर्ण निःशुल्क गरिएको थियो । साथै, शिविरकै अवसरमा न्यूनतम मूल्यमा चश्मा उपलब्ध गराइएको थियो । शल्यक्रियापछि २८० जनाले चश्मा प्रयोग गरेका थिए ।
शिविरलाई अझ प्रभावकारी बनाउन भीमेश्वर नगरपालिकाले आफ्ना नागरिकलाई आँखा शल्यक्रियामा लाग्ने खर्चमध्ये ५० प्रतिशत रकम व्यहोर्ने घोषणा गरेको थियो । शिविरमा सयौं बिरामीले आँखा परीक्षण गराएका थिए भने धेरैले शल्यक्रिया सुविधा पाएका थिए । स्थानीयवासीले यस्तो शिविरले ग्रामीण भेगका साधारण नागरिकलाई राहत दिएको भन्दै खुसी व्यक्त गरेका छन् ।
