काठमाडौं—अख्तियार दुरुपयोग अनुसन्धान आयोगले स्वास्थ्यका विभिन्न कार्यक्रम गर्ने भन्दैं पेश्की लिएर फर्स्योट नगरेका कपिलवस्तुको मायादेवी गाउँपालिकाका सिअहेब महेन्द्रप्रसाद यादवसहित ७ जना विरुद्ध भ्रष्टाचार मुद्धा दायर गरेको छ । आइतबार अख्तियारले सिअहेब यादवसहित ७ जना विरुद्ध विशेष अदालतमा भ्रष्टाचारको आरोपमा मुद्धा दायर गरेको हो ।
यादवसँग ४६ लाख ७ हजार ३ सय रुपैयाँ बिगो असुल उपर गर्न माग गरिएको छ ।
भ्रष्टाचारको मुद्धा दायर भएकाहरुमा मायादेवी गाउँपालिकाका तीन जना तत्कालीन प्रमुख प्रशासकीय अधिकृत रामचन्द्र ढकाल, प्रमेश्वर यादव र कृष्णप्रसाद तिमिल्सिना रहेका छन् । यसैगरी, ढकालबाट २० लाख १७ हजार ३ सय रुपैयाँ बिगो माग दावी गरिएको छ भने यादवसँग १५ लाख १९ हजार र तिमिल्सिनासँग १० लाख बिगो माग दावी गरिएको छ ।
यसैगरी, मायादेवी गाउँपालिकाका तत्कालीन लेखा अधिकृत प्रकाश गौतम, तत्कालीन लेखापाल तुल्सीराम पौडेल, मायादेवी गाउँपालिकामा कार्यरत लेखा सहायक गिरीराज गौतम विरुद्ध पनि भ्रष्टाचार मुद्धा दायर भएको छ । लेखा अधिकृत प्रकाश गौतमबाट १५ लाख ६० हजार, लेखापाल पौडेलबाट १९ लाख १७ हजार ३०० र लेखा सहायक गौतमबाट १४ लाख १० हजार विगो माग दावी गरिएको छ ।
यादवले स्वास्थ्य सम्बन्धी कार्यक्रमका नाममा २०७५/०७६ देखि २०७८/०७९ सम्म पेश्की स्वरुप लिएको ४६ लाख ७ हजार ३०० सय बेरुजु कायम देखिएको थियो । पेश्की फर्स्योट नगरी सरकारी सम्पत्ति हानी नोक्सानी पु¥याएको भन्दैं अख्तियारले विशेष अदालतमा भ्रष्टाचार मुद्धा दायर गरेको हो ।
