किन र कसरी पर्छ आँखामा फुलो ?

आँखाको नानी (कालो भाग)मा घाउ भएर पिप जमेको अवस्थालाई फुलो पर्नु भनिन्छ । नानीमा घाउ लागेपछि ब्याक्टोरिया, भाइरस र फंगल्सको कारण संक्रमण हुनु नै फुलो पर्नु हो । फुलो परेको आँखाको नानीमा सेतो टिका देखिन्छ ।

कारणहरु

• आँखामा चोट लाग्नु वा पात तथा अन्य कुराले पास्नु
• आँखा सुख्खा हुनु
• लामो समय आँखामा कन्ट्याक लेन्सको प्रयोग गर्नु वा यसको सही प्रयोग नहुनु
• आँखाको एलर्जी
• औषधी (स्टोरोइड)को गलत प्रयोग गर्नु

लक्षण

• आँखाको नानीमा सेतो टीका देखिनु
• आँखा रातो हुनुको साथै धमिलो हुनु
• घाम लागेको समयमा आँखा हेर्न अप्ठ्यारोे हुनु
• आँखा दुख्ने र आँशु बगिरहने हुनु
• कसैले बत्तिको वरीपरी इन्द्रेणीजस्तो देख्नु

यो समस्या जति सामान्य जस्तो लाग्छ, त्यो भन्दा निकै जटिल छ । मानिसहरुमा गाई, गोरु वा मान्छेको पिसाब वा दुध आँखामा राख्दा ठीक हुन्छ भन्ने भ्रम रहेको पाइन्छ । तर, यो आँखाका लागि झनै घातक हुनसक्छ । समयमै यसको उपचार गरिएन भने आँखाको दृष्टि नै गुम्न पनि सक्छ । त्यसैले डाक्टरको सल्लाहअनुसार जतिसक्दो छिटो यसको उपचार गर्नुपर्छ ।

डा.बेन लिम्बु
वरिष्ठ आँखा विशेषज्ञ, तिलगंगा आँखा प्रतिष्ठान