काठमाडौं—कपिलवस्तुको कृष्णनगर नगरपालिका फैलिएको झाडापखाला र बान्ताबाट बिरामी परेका ८ सय ८५ जनामध्ये ८ सय १९ जना निको भएका छन् । आइतबार स्वास्थ्य तथा जनसंख्या मन्त्रालयले एक विज्ञप्ती जारी गर्दै उक्त जानकारी दिएको हो ।
मन्त्रालयकाअनुसार २५ जना बिरामीको भने उपचार जारी रहेको छ । यस्तै, सो स्थानबाट कपिलवस्तु जिल्ला अस्पताल र बुटवलस्थित लुम्बिनी प्रादेशिक अस्पतालमा रिफर गरिएका ४० जना बिरामी पनि निको भएर डिस्चार्ज भइसकेका छन् ।
हालसम्म उक्त झाडापखाला र वान्ताका कारण चार जनाको मृत्यु भएको छ । मृत्यु भएकामध्ये ४५ वर्षीय एक जना पुरुषको घरमै मृत्यु भएको हो । यस्तै, ७ वर्षीय बालकको निजी क्लिनिकमा, ५ वर्षीया बालिका र २ वर्षीय बालकको उपचारका लागि अस्पताल ल्याउँदैं गर्दा मृत्यु भएको हो ।
मन्त्रालयकाअनुसार १८ असोजदेखि झाडापखाला फैलिएको कृष्णनगर ७, ८ र ९ वडामा प्रतिकार्यको काम जारी रहेको छ । जसमा स्थानीय, प्रदेश र संघीय सरकारका साथै विश्व स्वास्थ्य संगठन (डब्लुएचओ)लगायतका साझेदार संघसंस्थाहरुले समन्वयमा काम गरिरहेका छन् ।
उक्त क्षेत्रबाट डब्लूएचओको समन्वयमा विभिन्न मितिमा संकलन गरिएका दिसाका नमुनाहरु राष्ट्रिय जनस्वास्थ्य प्रयोगशाला र लुम्बिनी अस्पतालको प्रयोगशालामा परीक्षण गरिएको छ । जसमा ४ जनाको दिसामा भिबिरियो कोलेरा ०१ अगवा पाइएको छ । यस्तै, अन्य खानेपानीका १५ वटा नमुनामध्ये ९ वटामा इ—कोली ब्याक्टेरिया पाइएको छ ।
मन्त्रालयले सरसफाइमा ध्यान दिन, पानी उमालेर खान र साबुन पानीले मिचिमिची हात धुन आग्रह गरेको छ ।
