प्रधानमन्त्रीको भारत भ्रमणमा स्वास्थ्यका तीन एजेण्डा

काठमाडौं—प्रधानमन्त्री शेरबहादुर देउवा तीन दिने औपचारिक भारत भ्रमणका लागि नयाँदिल्ली पुगेका छन् । शुक्रबार नयाँदिल्ली प्रस्थान गरेका देउवासँगै स्वास्थ्य तथा जनसंख्या मन्त्री विरोध खतिवडा र स्वास्थ्य सचिव डा. रोशन पोखरेल पनि सहभागी छन् ।

स्वास्थ्य मन्त्रीको सचिवालयले दिएको जानकारीअनुसार भ्रमणका क्रममा स्वास्थ्यका केही विषयमा पनि सहमति हुनेछ ।

खासगरी प्रधानमन्त्रीको भ्रमणका क्रममा भारतले स्वास्थ्य मन्त्रालयलाई २ सय थान डाइलाइसिस मेसिन दिने सहमति हुनेछ । यसैगरी, तनहुँको दुलेगौडास्थित जिपी कोइराला राष्टिय श्वासप्रश्वास उपचार केन्द्रलाई स्वास्थ्य विज्ञान प्रतिष्ठानका रुपमा अगाडि बढाउने पनि भारतसँग सम्झौता गर्ने तयारी छ ।

नेपाल र भारत दुई देशका एमडि/एमएस विद्यार्थीलाई दुवै देशले दुईतिरकै मान्यता दिने समझदारीमा हस्ताक्षर गर्ने तयारी छ ।