भरतपुर महानगरकी मेयर रेणु दाहाल चढेको गाडी दुर्घटना, स्वास्थ्य अवस्था सामान्य

काठमाडौं—चितवनको भरतपुर महानगरपालिकाकी मेयर रेणु दाहालको गाडी दुर्घटना भएको छ । शुक्रबार दाहाल सवार गाडी जावलाखेलमा सडकको पोलमा ठोक्किएपछि टाउकोमा चोट लागेर उनी सामान्य घाइते भएकी हुन् ।

‘आज दिउँसो दिदी रेणु दाहाल काम विशेषले बाहिर जाने क्रममा उहाँ चढेको गाडी ललितपुरको जावलाखेल नजिकै ठोक्किन गई दिदीको टाउकोमा सामान्य चोट लागेको हो,’ दाहालकी बहिनी गंगा दाहालले भनिन्, ‘डाक्टरका अनुसार सिटी स्क्यान गरेर हेर्दा घाउ बाहिरी छालामा मात्रै भएको र अवस्था अहिले सामान्य भएकोले डाक्टरको सल्लाहमा डिस्चार्जको तयारीमा छौं।’

दाहालको पुल्चोकस्थित सुमेरु अस्पतालमा उपचार भइरहेको छ ।

०७४ सालमा सम्पन्न भएको स्थानीय तह निर्वाचनमा पहिलो पटक भरतपुर महानगरपालिकाको मेयर निर्वाचित भएकी उनी ३० बैशाखमा सम्पन्न स्थानीय तहको निर्वाचनबाट दोस्रो पटक महानगरको मेयरमा विजयी भएकी छन् ।