हिमाली जिल्ला हुम्लामा पहिलोपटक डेंगीका बिरामी देखिए

हेल्थ आवाज आईतबार, २०८१ असोज ६ गते, ०६:४९ मा प्रकाशित

वीरेन्द्रनगर- हिमाली जिल्ला हुम्लामा पहिलोपटक डेंगीका बिरामी देखिएका छन् । अत्याधिक ज्वरो आएपछि अस्पताल भर्ना गरिएका बालकको परीक्षण गर्दा डेंगी पुष्टि भएको हो ।

सिमकोट गाउँपालिका– ८ को खोल्सी गाउँका एघार वर्षका बालकलाई डेंगी पुष्टि भएको स्वास्थ्य सेवा कार्यालयका प्रमुख प्रेमबहादुर सिंहले बताए । ‘बालकको स्वाव भेरिफाइ गर्न तीन पटक ल्यावमा परीक्षण गर्दा डेंगी पुष्टि भएको हो,’ उनले भने, ‘बालकमा भएको डेंगी स्थानीय डेंगी हो ।’

अभिभावककाअनुसार डेंगी पुष्टि भएका बालक जिल्लाभन्दा बाहिर कतै पनि गएका थिएनन् । ज्वरो आउने र रुघाखोकी लागेपछि बालकलाई जिल्ला अस्पतालमा भर्ना गरिएको थियो । हालसम्म हुम्ला जिल्ला डेंगीबाट सुरक्षित रहँदै आएको थियो ।

वि.सं. २०७८ सालमा जिल्ला बाहिरबाट गएका एक जना मानिसलाई डेंगी देखिएको थियो । उनले जिल्लामा डेंगीका बिरामी देखिएका कारण सबैलाई सुरक्षित रहन आग्रह गरे ।