कर्णाली प्रदेश अस्पतालको निर्देशकमा डा. ढकाल नियुक्त

वीरेन्द्रनगर—सुर्खेत कर्णाली प्रदेश अस्पतालको निर्देशकमा डा. केशर ढकाल नियुक्त भएका छन् । शनिबार बेलुका बसेको प्रदेशको मन्त्रिपरिषद् बैठकले डा. ढकाललाई निर्देशकमा नियुक्त गर्ने निर्णय गरेको हो ।

निर्देशकका लागि सामाजिक विकास मन्त्रालयले अस्पतालमै कार्यरत डा. गणेश थापा र डा. ढकालको गरी दुई जनाको नाम मुख्यमन्त्री तथा मन्त्रिपरिषद्को कार्यालयमा सिफारिस गरेको थियो । जसमध्ये डा. ढकाललाई निर्देशकमा नियुक्त गरिएको हो ।

यसअघिका निर्देशक डा. डम्बर खड्काको अवकाश भएसँगै निर्देशक पद रिक्त थियो ।

डा. ढकाल अस्पतालका प्रमुख कन्सल्ट्यान्ट गाइनोकोलोजिष्ट हुन् ।