जुम्ला—तिला गाउँपालिका–३ कुडारीस्थित स्वास्थ्य चौकीको भवनमा वडा कार्यालय राखिएको छ । दुई वर्षदेखि स्वास्थ्य चौकीको भवनमा ३ नम्बर वडा कार्यालय राखिएको हो ।
जसका कारण स्वास्थ्य सेवा प्रभावित भएको छ । बिरामी जाँच्ने, औषधि उपचार गर्ने स्वास्थ्य चौकीमा वडा कार्यालय राखिनु वडाध्यक्षको हस्तक्षेप भएको स्थानीय बताउँछन् । वडा कार्यालय सरकारी संरचना भएपनि जनप्रतिनिधि वडाध्यक्ष, सदस्य राजनीतिक पार्टीबाट निर्वाचित भएका व्यक्ति हुन्छन् ।
राजनीतिसँग जोडिएको वडा कार्यालय भएकोले बेला—बेला विभिन्न वादविवाद, छलफल, बन्द, हड्ताल भइरहने हुन्छ । जसका कारण स्वास्थ्य चौकीले प्रवाह गर्ने स्वास्थ्य सेवा प्रभावित हुन पुगेको छ ।
१६ भदौंमा वन सम्बन्धीको वडा सिफारिसका विषयमा विवाद भएर स्वास्थ्य चौकीको भवनमा रहेको वडा कार्यालयमा करिब ९० जनाको संख्यामा आएका स्थानीयले तालाबन्दी नै गरेका छन् ।
तालाबन्दीले स्वास्थ्य चौकीमा आउने बिरामीलाई स्वास्थ्यकर्मीले चेकजाँच र उपचार गर्न कठिन भएको थियो ।
स्वास्थ्य चौकीको भवनमा वडा कार्यालय राखिदा निकै समस्या भोग्नु परेको स्वास्थ्यकर्मीले गुनासो गरेका छन् । यहाँ प्रसुति सेवा गृह पनि छ । साउनदेखि यता ९ जना महिला सुत्केरी भएका छन् । गत वर्ष २६ जना सुत्केरी भएका थिए । स्वास्थ्य चौकीमा दैनिक १०/१५ जना औषधि उपचारका लागि आउने गरेका छन् ।
स्वास्थ्य चौकीजस्तो संवेदनशील ठाउँमा वडा कार्यालय राखेर सेवा प्रभावित भएका छ । स्वास्थ्य चौकीकै ५/६ वटा शाखा हुन्छन् । ‘अहिले सवै शाखा तीन वटा कोठामा सिमित गरेका छौं,’ एक स्वास्थ्यकर्मीले भने, ‘अफिस कोठा र तालिम हल एउटै कोठमा छ । भौतिक संरचना अभाव बनाएर वडा कार्यालय राखिनु दुखद् पक्ष हो ।’
स्वास्थ्य चौकी इन्चार्ज तिलबहादुर शाहीका अनुसार सरकारी भवनमा सरकारी कार्यालय राख्दा फरक नपर्ने प्रतिक्रिया दिए । ‘धेरै कुरा पनि हामीले बुझेनौं । तर, वडामा बन्द हड्ताल हुँदा स्वास्थ्य सेवा प्रवाहमा प्रभाव नै पर्ने रहेछ । यहाँको राजनीतिक, गाउँपालिका, वडा पालिका राखेर तत्काल उपयुक्त निर्णय लिने छौं,’ उनले भने ।
वडाध्यक्ष धनबहादुर शाहीले भने भाडाको घरमा वडा कार्यालय राख्नुभन्दा सरकारी संरचना स्वास्थ्य चौकी भवन कार्यालय राखिएको बताए । ‘वडा कार्यालय भएको भवनको जग्गामा १० शय्याको अस्पताल बन्दैंछ । पछि भवन निर्माणपछि स्वास्थ्य चौकी अस्पतालसँग गाभिन्छ । अहिलेको स्वास्थ्य चौकीको भवनमा वडा कार्यालय नै रहने योजना छ,’ उनले भने । तर, वडाध्यक्ष शाहीले तत्काल वडा कार्यालयका कारण स्वास्थ्य सेवामा पारेको प्रभावबारे केही बताउन चाहेनन् ।
गाउँपालिका अध्यक्ष मोतीलाल रोकायाले सहमतिमै स्वास्थ्य चौकीको भवनमा वडा कार्यालय राखिएको बुझिएको बताए । उनले भने, ‘वडा कार्यालयका कारण स्वास्थ्य सेवा प्रभावका विषयमा बुझेर निर्णय गर्ने छौं ।’
स्वास्थ्य चौकीको भवनमा वडा कार्यालय राखिनु उपयुक्त नभएको जिल्ला समन्वय समितिका प्रमुख गौरीनन्द आयार्यले बताए । उनले भने, ‘एउटा कार्यालयले अर्काे कार्यालयलाई प्रभाव पार्ने गरी राखिनु हुँदैन । विकल्पको खोजी गर्नुपर्दछ ।’
