बजारमा मास्क अभाव, ४० फार्मेसी र मेडिकलमध्ये २८ वटामा मास्क छैन

काठमाडौं—विश्वमा कोभिड–१९को संक्रमण फैलिएसँगै नेपाली बजारमा मास्कको अभाव देखिन थालेको छ । बजारमा मास्कको अभाव देखिन थालेपछि व्यापारीहरुले मनपरी मुल्य लिन थालेका छन् ।

बजारका मेडिकल, फार्मेसी, पसलहरुमा मास्क दोब्बर—तेब्बर महंगो मुल्यमा बेच्न थालेका छन् । मास्कको मुल्य आकाशिएको गुनासो गर्नेमा आम सर्वसाधारण मात्रै नभएर मेडिकल व्यापारीहरुको पनि छन् ।

हेल्थआवाजले मंगलबार र बुधबार बजारका केही मेडिकल, फार्मेसीहरु मास्कको बजार मुल्य सर्वेक्षण गरेको थियो । उक्त सर्वेक्षणका क्रममा ४० वटा फार्मेसी तथा मेडिकलमध्ये २८ वटामा मास्क नभएको पाइएको छ ।  हेल्थ आवाज पुगेका ४० मध्ये १२ वटा पसलमा मात्रै मास्क पाइएको छ ।

यस क्रममा कतिपय मेडिकलले मास्क नभएको र बजारमा मास्कको मुल्यमा चर्काे वृद्धि भएका कारण मास्क खरिद नगरेको जानकारी दिए । यस्तै, मास्क उपलब्ध भएका अधिकांश मेडिकल र फार्मेसीहरुमा भने पसलैपिच्छे मास्कको मुल्यमा फरक देखिएको छ ।

बुधबारमात्रै सरकारले बजारमा मास्कको मनपरी मुल्य असुल्नेलाई कारवाही गर्ने जनाएको थियो । बिहीबार काठमाडौं उपत्यकाका केही स्थानमा अनुगमन टोलीले अनुगमन पनि गरेको छ । साविकभन्दा उच्च मुल्यमा मास्क बेच्ने तथा लुकाइएका फार्मेसीहरुलाई औषधि व्यवस्था विभागले सम्बन्धित निकाय तथा प्रहरी प्रशासनको सहयोगमा कारवाही थालिएको औषधि व्यवस्था विभागका निर्देशक नारायण ढकालले जानकारी दिए । यसका साथै मास्क महंगोमा बेचेको वा लुकाइएको पाइएमा ११३७ नम्बरमा खबर गर्न समेत सरकारले सर्वसाधारणलाई आग्रह गरेको छ ।