‘कोभिड-१९’को इपिसेन्टर उदयपुर बन्ला ?

काठमाडौं – नेपालमा कोरोना भाइरस (कोभिड १९) को इपिसेन्टर उदयपुर हुन सक्ने अनुमान विज्ञहरुले गर्न थालेका छन् । मंगलबार थप ८ जनामा कोभिड संक्रमण देखिएसँगै उदयपुर जिल्ला कोरोनाको इपिसेन्टर बन्ने खतरा रहेको हो ।

यसअघि ५ बैशाखमा उदयपुरको त्रियुगा नगरपालिकास्थित भुल्केमा रहेको मस्जिदमा बसिरहेका १६ जनामध्ये १२ जना भारतीय नागरिकमा कोभिड—१९ पुष्टी भएको थियो । त्यसको सात दिन पुग्न नपाउँदै थप ८ संक्रमित पक्ता लागेका हुन ।

स्वास्थ्य मन्त्रालय स्रोतका अनुसार यसबारे औपचारिक जानकारी भने आइसकेको छैन । संक्रमित थपिएको हो भने नेपाल तेस्रो फेज अर्थात समुदायमा पनि जान सक्ने खतरा बढेको छ । नेपालमा हालसम्म एकै ठाउँमा केस फैलिएको थिएन । विभिन्न जिल्लामा गरी ३१ संक्रमित पत्ता लागेका थिए । जसमध्ये ४ जना निको भएर घर गइसकेको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले बताए ।

यससँगै नेपालमा कोभिड संक्रमितको संख्या ३९ पुग्यो । यता, उदयपुरमा मात्रै संक्रमितको संख्या  २० पुगेको छ । विराटनगरमा गरिएको परिक्षणलाई कन्फम गर्न धरान पठाइएको स्वास्थ्य कार्यालय प्रदेश एक कोभिड १९ सूचना केन्द्रका प्रमुख ज्ञान बहादुर बस्नेतले बताए ।