स्वास्थ्य मन्त्रालयले आयोगलाई भन्यो, ‘कम्तिमा २ वर्ष काम गरेकालाई मात्र सरकारी सिटमा राख्नु’

काठमाडौं–स्वास्थ्य तथा जनसंख्या मन्त्रालयले सरकारी सिटमा विशेषज्ञ चिकित्सा छात्रवृत्तिमा अध्ययन गर्नका लागि कम्तिमा २ वर्ष सरकारी स्वास्थ्य संस्थामा काम गरेको हुनुपर्ने व्यवस्था गर्न राष्ट्रिय चिकित्सा शिक्षा आयोगलाई पत्र पठाएको छ । मन्त्रालयले सोमबार स्वास्थ्य सचिवस्तरीय निर्णय गरी सो पत्र पठाएको हो ।

चिकित्सा शिक्षा नियमावली—२०७७ ले ५० प्रतिशत खुल्ला ४० प्रतिशत सरकारी चिकित्सक र १० प्रतिशत विदेशी कोटा तोकेको छ । जसमध्ये ४० प्रतिशत सरकारीमा विवाद हुँदै आएको छ । नियमावलीले करारमा काम गरिरहेका १ वर्ष पुगेका चिकित्सकलाई पनि छात्रवृत्तिमा अध्ययनको बाटो खुलाएको छ ।

तर, स्वास्थ्य तथा जनसंख्या मन्त्रालयले सो नियमावलीमा त्रुटी भएको भन्दै स्थायी भएको या करारमा काम गरिरहेको कम्तिमा दुई वर्ष पूरा भएकोले मात्र छात्रवृत्तिमा पढ्ने उम्मेदवार हुन पाउने व्यवस्था गर्न पत्र पठाएको हो ।