विराटनगर– अस्पतालबाट निस्किएका फोहोरले संक्रमण फैलने खतरा बढेपछि प्रदेश सरकार यसको व्यवस्थापनमा भएको छ । विभिन्न अनुसन्धानले अस्पतालबाट निस्किएका फोहोरबाट संक्रमण फैलिन नदिनका लागि प्रदेश १ सरकारले अस्पतालजन्य फोहोरलाई व्यवस्थित गर्ने कामको सुरूवात गर्ने भएको हो ।
प्रदेश १ का सामाजिक विकास मन्त्री जीवन घिमिरेले १४ जिल्लाकै सरकारी अस्पतालबाट निस्कने फोहोरको व्यवस्थापनका लागि सरकारले काम सुरु गरिएको जानकारी दिए । मन्त्रालयमा आयोजित अस्पतालको फोहोर व्यवस्थापन संम्बन्धि कार्यक्रममा मन्त्री घिमिरेले निजी अस्पतालको फोहोर व्यवस्थापन चुनौतिपूर्ण रहेको बताए ।
‘निजी अस्पतालबाट निस्कने फोहोरले पनि समस्या सिर्जना गरिरहेको छ,’ उनले भने, ‘निजी अस्पतालको फोहोर व्यवस्थापनका लागि पनि अस्पताल सञ्चालकहरुसँग मन्त्रालयले छलफल अघि बढाएको छ । विराटनगरमा निजी स्तरबाट सञ्चालित साना अस्पतालको फोहोर व्यवस्थापनका लागि त्रिपक्षिय साझेदारी मोडलबाट काम गर्ने तयारी गरिएको छ ।’
विराटनगर बाहिरका निजी अस्पतालहरुको फोहोर व्यवस्थापनबारे पनि छलफल भइरहेको मन्त्री घिमिरेले बताए । फोहोर व्यवस्थापन प्रदेश सरकारको प्राथमिकतामा रहेकाले अस्पतालमात्र नभएर हरेक फोहोरको सफाईमा प्रदेश सरकार लागि परेको उनको भनाई छ ।
सरकारी अस्पतालको फोहोर व्यवस्थापनका लागि बजेट समेत विनियोजन भैसकेको प्रदेश जनस्वास्थ्य निर्देशनालयका जनस्वास्थ्य प्रशासक डा. सुरेश मेहताले बताए । उनले चालु आर्थिक बर्षबाट सरकारी अस्पतालहरुमा फोहोर व्यवस्थापनको काम व्यवस्थित हुँदै जाने बताए ।
कोशी अस्पताल विराटनगरका मेडिकल सुपरिटेन्डेन्ट डा. चुमनलाल दासले कोशी अस्पतालमा व्यवस्थित फोहोर व्यवस्थानको काम सुरु भएको बताए ।
उनले फोहोर जलाउने नभई कमाउने माध्यमका रुपमा लिनुपर्ने बताए । कार्यक्रममा अस्पतालजन्य फोहोर व्यवस्थापनको क्षेत्रमा कार्यरत संस्था हिकाफ ३६० ले इनरुवा अस्पताल र कोशी अस्पताल कोभिड १९ उपचार केन्द्रको फोहोर व्यवस्थापन सम्बन्धिको अध्यययन प्रतिवेदन प्रस्तुत गरेको थियो । हिकाफका कार्यकारी निर्देशक महेश नकर्मीले इनरुवा अस्पतालको फोहोर व्यवस्थापन व्यवस्थित नभएको बताए । कोशी कोभिड अस्पतालले फोहोर व्यवस्थापनको काम व्यवस्थित गरेको पाइएको उनले बताए ।
