सन् २०३० मा मातृ मृत्यु ७० मा झार्ने दिगो विकास लक्ष्य संकटमा

काठमाडौं—सरकारको सन् २०३० मा मातृ मृत्यु ७० मा झार्ने दिगो विकास लक्ष्य संकटमा परेको छ । कोरोना संक्रमणका कारण उक्त लक्ष्य नै संकटमा परेको हो । सरकारले दिगो विकास लक्ष्यअनुरूप सन् २०३० सम्ममा प्रति लाख जीवित शिशुको जन्म हुँदा गर्भवतीको मृत्युलाई ७० जनामा सिमित बनाउने लक्ष्य लिएको थियो ।

उक्त लक्ष्य अनुसार सन् २०२० मा मृत्युलाई १२५ जनामा सिमित बनाउनु पर्नेछ । तर, उक्त योजना पूरा गर्न ज्यादै कठिन भएको परिवार कल्याण महाशाखाअन्तर्गत मातृ तथा नवजात शिशु शाखाकी प्रमुख डा. पुण्या पौडेलले बताइन् ।

स्वास्थ्य तथा जनसंख्या मन्त्रालयकाअनुसार सन् २०२० को १० महिनामा १९३ जना गर्भवती महिलाको मृत्यु भइसकेको छ । जुन संख्या सरकारको लक्ष्यभन्दा ६८ जना बढी हो । पछिल्लो चार महिनामा ८४ जना गर्भवती महिलाको मृत्यु भएको छ । मन्त्रालयले सन् २०२१ मा गर्भवती आमाको मृत्यु १२५ बाट पनि घटाएर प्रति एक लाख जन्ममा ९९ मा झार्ने लक्ष्य लिएको छ ।