काठमाडौं– शहिद गंगालाल हृदय रोग केन्द्रले कोरोना महामारीको बीचमा ७० हजार ४ सय २४ जना बिरामीलाई ओपीडी सेवा दिएको छ । अस्पतालको २५ औं वार्षिकोत्सवको अवसरमो कोरोनाको महामारीकै बीचमा पनि ७० हजार भन्दा बढी बिरामीलाई ओपीडी सेवामार्फत उपचार गरिएको जनाएको हो ।
नेपालमा मुटुरोगको निदान तथा मुटुरोगीहरुको उपचार तथा पुनःस्थापनाका लागि २०५२ सालमा स्थापना भएको यस अस्पतालले २५ वर्षको अवधिमा १९ लाख बिरामीको उपचार गरिएको अस्पतालले जारी गरेको प्रतिवेदनमा उल्लेख छ । साथै, ८० हजार बिरामीको विभिन्न खाले क्याथ प्रोसेड्युअर र २५ हजार बिरामीको मुटुको शल्यक्रिया गरिएको अस्पतालले जनाएको छ । ९ शैयाबाट सुरु भएको यो अस्पतालमा अहिले २ सय ३९ शैयाबाट सेवा दिइरहेको छ ।
कोरोना महामारी अर्थात सन् २०२० मा यस अस्पतालमा ७ हजार २ सय ४० जना बिरामीको भर्ना गरेर उपचार गरिएको छ । साथै ६ सय ९२ जना बिरामीको विभिन्न खालको मुटुको शल्यक्रिया गरिएको अस्पतालले जनाएको छ । अस्पतालले गत वर्षबाट गरिव विपन्न वर्गका लागि न्युन शुल्कमा प्राइमरी एन्जियोप्लास्टि सुविधा समेत दिँदै आएको छ । साथै गतवर्ष २ हजार ५ सय ७३ जनाको कोरोनरी एन्जिओग्राम, १ हजार २ सय २७ जनाको कोरोनरी एन्जिओप्लास्टी, १ सय ४५ जनाको पीटीएमसी, १ सय १० जनाको इपीएस/आरएफए, १ सय ८७ जनाको डिभाइस क्लोजर्स, ३ सय २९ जनाको पेसमेकर, २ हजार २ सय ९ जनाको सिटी स्क्यान गरिएको केन्द्रका निर्देशक डा. चन्द्रमणी अधिकारीले जानकारी दिए ।
कोभिड–१९ को महामारीका बीचमा पनि केन्द्रले कुनैपनि सेवा बन्द नगरी बिरामीलाई सेवा दिएको थियो । यो अवधिमा करिव ४ सय कोभिड–१९ संक्रमितको उपचार भएको अस्पतालले जनाएको छ ।
