विराटनगर—सुनसरीको धरानस्थित विपी कोइराला स्वास्थ्य विज्ञान प्रतिष्ठानमा कार्यरत चिकित्सकहरूले राखेको माग पूरा नगरेपछि आन्दोलित भएका छन् । उनीहरूले बढुवालगायतका विभिन्न माग राखेका थिए ।
तर, विपी प्रतिष्ठानका उपकुलपतिले सुनवाइ नगरेपछि सामूहिक रूपमा चिकित्सक आन्दोलित भएका हुन् । प्रतिष्ठानको चिकित्सा तथा दन्त–चिकित्सा शिक्षक कल्याण समाजमा आवद्ध डाक्टरहरूले उपकुलपति प्रा.डा. ज्ञानेन्द्र गिरीको कार्यकक्षमा बुधबार तालाबन्दी गर्दै सामूहिक राजीनामा दिने चेतावनी दिए । उनीहरूले तीन वर्षदेखि रोकिएको बढुवा प्रक्रिया प्रतिष्ठान पदाधिकारीहरूले अगाडि नबढाएको भन्दै तालाबन्दी गरेका छन् ।
उपकुलपति प्रा.डा. गिरी भने शिक्षाध्यक्ष प्रा.डा. गुरु खनालसहित पाँच दिनदेखि काठमाडौंमा छन् । विपीका २७० डाक्टरहरुले आफ्ना मागहरु पूरा नभए सामूहिक राजीनामा दिने चेतावनी पनि उपकुलपतिलाई दिएका छन् ।
कार्यकक्ष तालाबन्दी गरेपछि चिकित्सा तथा दन्त–चिकित्सा शिक्षक कल्याण समाजका अध्यक्ष डा. विष्णु पोखरेलले चिकित्सकहरूको माग सुनवाई नभए सामूहिक राजीनामा दिने चेतवीन दिए । ‘अब हामी एक हप्ता पर्खनेछौं । त्यसपछि पनि माग सम्बोधन नभए समाजमा आबद्ध २ सय ७० जना चिकित्सकले सामूहिक राजीनामा दिनेछौं,’ उनले भने ।
यस्ता छन् विपीका चिकित्सकको माग
विपी प्रतिष्ठानका चिकित्सकहरू बढुवालगायतका विभिन्न माग राखेर आन्दोलित छन् । तर, चिकित्सकले उठाएको माग प्रतिष्ठानले कुनै सुनवाई गरेको छैन । उनीहरूले आवास मर्मतका लागि उठाएको रकम आवास मर्मतमा खर्च गर्नुपर्ने, फ्याकल्टीहरूलाई आवास उपलब्ध गराउन भवन निर्माणका लागि पहल गर्नुपर्ने, विभागीय प्रमुखहरूको रोटेसन मिलाउनुपर्ने, शिक्षकहरूलाई टिचर्स ट्रेनिङ र अनुसन्धनात्मक तालिम दिलाउनुपर्ने रहेका छन् ।
यसैगरी प्रतिष्ठानबाट निस्केको क्लिनिकल फोहोरमैलाको वैज्ञानिक व्यवस्थापन हुनुपर्ने, सहज इन्टरनेटको व्यवस्था गर्नुपर्ने, प्रतिष्ठानभित्र विद्युत चोरी गर्नेलाई कारबाही गर्नुपर्नेलगायत माग पनि चिकित्सकहरूले गरेका छन् । आन्दोलन सुरु भएपछि गत माघ २६ गते समाज र प्रतिष्ठान पदाधिकारीबीच भएको वार्तामा उपकुलपतिलगायत पदाधिकारीहरूले माग सम्बोधन गर्ने आश्वासन दिएका थिए । तर, १० दिनभन्दा बढी बितिसक्दा पनि दिएको आश्वासनअनुसार प्रगति नभएपछि तालाबन्दी गर्नु परेको समाजले जनाएको छ ।
‘हाम्रो मुख्य माग बढुवा हो । तीन वर्षदेखि प्रतिष्ठानमा बढुवा प्रक्रिया रोकिएको छ । बढुवा प्रक्रिया रोकिँदा त्यसको क्षति प्रतिष्ठानले नै व्यहोर्नु परेको छ,’ समाजका अध्यक्ष पोखरेलले भने, ‘समय अवधिअनुसार बढुवा नहुँदा धेरै चिकित्सकहरू प्राध्यापक हुन पाएका छैनन् । प्राध्यापक हुन नपाएपछि उनीहरूको वृत्ति विकास त रोकियो नै त्यससँगै हुने तलब सुविधा पनि पाउन सकेका छैनन् । विद्यार्थीको भर्ना पनि हुन सकेको छैन ।’
समाजका महासचिव डा. एसपी रिमालले चिकित्सकको आन्दोलनले उपचार सेवालाई प्रभावित नबनाएको बताए । उनले सामूहिक राजीनामा नदिएसम्म बिरामी उपचार सेवामा रहेर नै आन्दोलित भइरहेको बताए । पाँच दिनदेखि काठमाडौंमा रहेका प्रतिष्ठानका उपकुलपति गिरीले चिकित्सक समाजको माग सम्बोधन गर्नकै लागि मन्त्रालय र लोकसेवा आयोगमा ताकेता गरिरहेको बताए । उनले चिकित्सकहरूको माग जायज भएको बताए । उनले भने, ‘उहाँहरूकै काम गर्न भनेर म पनि कुदिरहेछु । उहाँहरूको बढुवा प्रक्रियाको फाइल लोकसेवा आयोगमा अगाडि बढेको छ ।’
