कालिकोटको पचालझरनामा भिडियो एक्स–रे सेवा 

सुर्खेत – कालिकोट जिल्लाको  पचालझरना गाउँपालिकामा भिडियो एक्स–रेमार्फत गर्भवती चेकजाँच सेवा सुरु भएको छ । पचालझरना गाउँपालिकाले गाउँमा नै प्रसूति सेवा गुणस्तरीय बनाउनका लागि भिडियो एक्स–रे सेवा सुरु गरेको हो ।

प्रविधि नहुँदा बच्चा जन्माउन नसकेर धेरै संख्यामा प्रसूति ब्यथाले छटपटिएकी महिलालाई हेलिकप्टरमार्फत थुप्रै चुनौती मोलेर उद्धार गर्नु परेको समस्यालाई समाधान गर्नका लागी गाउँपालिकामा अल्ट्रासाउन्ड मेसिनबाट गर्भवती चेकजाँच सुरु गरेको छ ।

गाउँपालिकाको स्वास्थ्य केन्द्रमा भिडियो एक्स–रे मेशिन जडान गरिएको गाउँपालिका उपाध्यक्ष अल्किना बमले बताइन् । ‘थुप्रै चुनौतीका बाबजुद गाउँपालिकामा रहेका सम्पूर्ण गर्भवती महिलाहरूको लागी भिडियो एक्स–रे सुरु भएको छ ।’ उनले भनिन्,‘अल्ट्रासाउन्ड मेशिन जडान भएसंगै अब पालिकामै समयमै पेटमा रहेको बच्चाको अवस्था बुझ्न सहज हुनेछ ।’

स्वास्थ्य सेवालाई प्रभावकारी बनाउनका लागि हामीले आधुनिक प्रविधि जडानमा तीव्रता दिएको गाउँपालिकाका स्वास्थ्य शाखा प्रमुख बिरेन्द्र सन्ज्यालले बताए ।