हिमाली जिल्ला हुम्लाको दुर्गम गाउँमा औलोको नमुना संकलन

वीरेन्द्रनगर—हुम्ला जिल्लाको दुर्गम वस्ती ताजाकोट गाउँपालिका –३ को मासपुुर गाउँका लक्षण देखिएका १२ जना बिरामीको औलो रोगको नमुना संकलन गरिएको छ । गाउँपालिका स्वास्थ्य शाखाबाट मासपुर पुगेको स्वास्थ्यकर्मीको टोलीले औलो रोगसँग लक्षण मिल्ने बिरामी देखिएपछि नमुना संकलन गरेको हो ।

गाउँमा स्वास्थ्य परीक्षण गर्दा औलो रोगसम्म मिल्ने लक्षणका बिरामी देखिएपछि नमुना संकलन गरिएको गाउँपालिका स्वास्थ्य शाखाका प्रमुख धनराज ढकालले बताए । ‘सम्भावित औलो रोग हुन सक्ने देखिएपछि नमुना संललन गर्ने कार्य भएको छ,’ उनले भने, ‘ल्याब परीक्षण गरेपछि रोग पत्ता लाग्नेछ ।’

हुम्ला हिमाली जिल्ला हो । तर, हुम्लाको ताँजाकोट गाउँपालिकामा वर्षेनी औलोका बिरामी देखा पर्दै आएका छन् । १५६ जना बिरामीको स्वास्थ्य परीक्षण गर्दा १२ जनामा औलोको नमुना लिइएको हो ।

स्वास्थ्य शाखाले औषधि छर्कने र झुल वितरण गर्ने काम गर्दै आएको छ ।