स्वास्थ्य मन्त्रालयको प्रवक्तामा डा. प्रकाश

काठमाडौं—स्वास्थ्य तथा जनसंख्या मन्त्रालयको प्रवक्ताको जिम्मेवारी डा. प्रकाश बुढाथोकीले पाएका छन् । गत मंगलबार मन्त्रीस्तरीय निर्णय गर्दै मन्त्री मोहनबहादुर बस्नेतले उनलाई मन्त्रालयको प्रवक्तामा नियुक्त गरेका हुन् ।

११ औं तहका डा. बुढाथोकी केन्द्रीय कारागार अस्पतालको मेडिकल सुपरिटेन्डेन्ट (मेसु) हुन् । नयाँ नियुक्तिले उनलाई न मन्त्रालयको काम गर्न सहज हुनेछ न त अस्पतालको नै ।

मेसु अस्पतालको कार्यवाहक प्रमुख हुने भएकाले उनले अस्पतालको नियमित कामकाजको जिम्मेवारी सम्हाल्नुपर्छ भने मन्त्रालयको काम कारवाहीमा नियमित अपडेट रहनुपर्ने प्रवक्ताको भूमिका पनि उनले खेल्नुपर्नेछ ।

चार महिनाअघि मन्त्रालयका प्रवक्ता रहेका डा. सन्जयकुमार ठाकुर सरुवा भएपछि प्रवक्ताको पद रिक्त थियो ।