विराटनगर—विराटनगरस्थित कोशी अस्पतालमा पहिलो पटक टाउकोको ‘क्रेनियोप्लाष्टिक’ सर्जरी गरी सफल उपचार गरिएको छ । विराटनगर–१२ बखरकीका ५२ वर्षीय भरतलाल राजवंशीको टाउकोको सफल ‘क्रेनियोप्लाष्टिक’ सर्जरी गरिएको हो ।
राजवंशी सवारी दुर्घटनामा परी टाउकोमा चोट लागेको थियो । उनी सिटी सफारी चालक हुन् । घाइते भएका राजवंशीले विराटनगरको निजी हस्पिटलमा गएर उपचार गरे । उपचारमा आफूसँग भएको र ऋण खोजेर आठ लाख रुपैयाँ सके ।
तर, उनी पूर्ण रुपमा ठिक भएनन् । आर्थिक अवस्था नाजुक भएका राजवंशी ऋण खोजेर थप उपचारको लागि निजी हस्पिटल जानसक्ने अवस्था थिएन । त्यसपछि उनी गत बिहीबार कोशीमा पुगेका थिए ।
उनको स्वास्थ्य उपचार हेरेपछि चिकित्सकले शल्यक्रिया गर्नुपर्ने सुझाव दिए । चिकित्सकको सुझावअनुसार शुक्रबार राजवंशीको टाउकोको ‘क्रेनियोप्लाष्टिक’ सर्जरी गरिएको हो ।
कोशी अस्पतालका न्यूरो सर्जन डा. चन्द्रप्रकाश यादवको टिमले राजवंशीको टाउकोको क्रेनियोप्लाष्टी सर्जरी गरेका हुन् । कोशीमा टाउको क्रेनियोप्लाष्टिक सर्जरी पहिलो पटक गरिएको उनले बताए । ‘न्यूरो सर्जरी सेवा सुरु भएको डेढ वर्ष भयो । अहिलेसम्म २० वटाभन्दा बढी शल्यक्रिया गरियो,’ उनले भने, ‘अहिलेसम्म गरिएको शल्यक्रियामध्ये टाउकोको क्रेनियोप्लाष्टी सर्जरी पहिलो हो । यो जटिल अप्रेसन हो । ब्रेन धेरै मात्रामा स्वइलीङ भएको थियो । हामीले शल्यक्रियाको माध्यमबाट क्रेनियोप्लाष्टिक सर्जरी गरेका हौं ।’
उपचारपछि भरतलाल राजवंशी घर जाने तयारीमा
शल्यक्रिया गरेको एक सातापछि राजवंशी सोमबार डिस्चार्ज भएका छन् । ‘स्वास्थ्यमा सुधार आएपछि हामीले डिस्चार्ज गरिएका हौं,’ डा. यादवले थपे, ‘अहिले उहाँ ठिक हुनुभएको छ । विगतको जस्तै गरी अब राम्रोसँग हिडडुल गर्नसक्ने हुनुभएको छ ।’
उपचारपछि श्रीमानको स्वास्थ्य अवस्था ठिक भएपछि श्रीमती संगीता राजवंशी हर्षित मुद्रामा देखिइन् । ‘अहिले उहाँ (श्रीमान) हाँस्न र बोल्न सक्ने हुनुभएको छ । एक साताको उपचारपछि डिस्चार्ज हुनु भएको हो,’ उनले भनिन्, ‘चिकित्सक र अस्पतालले श्रीमानलाई बचाउन गरेको यो सहयोग म बिर्सन सक्दिनँ । उपचारमा सहयोग पु¥याउने प्रति आभारी छु ।’
यसअघि पनि कोशी अस्पतालमा टाउकोमा गाडिएको हड्डी शल्यक्रिया गरी निकालिएको थियो । कोशी अस्पतालमा जटिल प्रकारको शल्यक्रिया पनि हुन सुरु भएको कोशी अस्पतालका प्रमुख मेडिकल सुपरिन्टेण्डेन्ट (मेसु) डा. चन्द्रभाल झाले बताए । कोशीमा न्यूरो सर्जरीको सेवाहरु अहिले संचालनमा रहेको उनले बताए । आर्थिक रुपमा विपन्न परिवारले उपचार खर्च नभएको बताएपछि अस्पतालले शल्यक्रियादेखि उपचार खर्च पनि निःशुल्क गरेको उनले बताए ।
