काठमाडौं—स्वास्थ्य तथा जनसंख्या मन्त्रालयले असार मसान्तमा अगाडि बढाएको विदेशी औषधि कम्पनीको जिएमपी अडिट प्रक्रियामा अर्थ मन्त्रालयले लगाम लगाइदिएको छ । ‘आर्थिक चलखेल र अपारदर्शी’ भएको भन्दैं उक्त जिएमपी अडिट प्रक्रिया विरुद्ध अख्तियार दुरुपयोग अनुसन्धान आयोगमा झण्डै एक दर्जन उजुरी परेका थिए ।
स्वास्थ्य सचिव डा. विकास देवकोटा, औषधि व्यवस्था विभागका महानिर्देशक नारायण ढकाल विरुद्ध अख्तियारमा उजुरी परेपनि स्वास्थ्य मन्त्रालयको राजनीतिक नेतृत्वले समेत उक्त प्रक्रियालाई नरोकेर अगाडि बढाएको थियो । तर, अर्थ मन्त्रालयले अपरादर्शी र आर्थिक चलखेल भएको भन्दैं उजुरी परेपछि विवादित बनेको उक्त जिएमपी अडिट प्रक्रिया अन्तिम समयमा रोकिदिएको हो ।
स्वास्थ्य मन्त्रालयको राजनीतिक र प्रशासनिक नेतृत्वले बुधबार अन्तिम अवस्थासम्म उक्त अडिट प्रक्रिया अगाडि बढाउन कसरत गरेको थियो । ‘अर्थले यो विवादित प्रक्रिया रोकिदिएको छ,’ अर्थ स्रोतले भन्यो, ‘प्रक्रिया अपारदर्शी भएको र आर्थिक चलखेल भएको भन्दैं विभिन्न ठाउँमा उजुरी परेको पाइएपछि अर्थले विदेशी औषधि कम्पनीको जिएमपी अडिट प्रक्रिया रोकिदिएको छ ।’
उक्त प्रक्रियामा अर्थले लगाम लगाइदिएपनि अझैपनि स्वास्थ्यका अधिकारीहरु ‘ब्याक डेट’मै भएपनि विदेशी औषधि कम्पनीको जिएमपी अडिट अगाडि बढाउन कसरत गरिरहेका छन् । तर, त्यो सम्भावना एकदमै न्यून रहेको अर्थ स्रोतको दावी छ ।
अख्तियारमा परेको उजुरीमा विदेशी कम्पनीहरुलाई नेपाली बजारमा औषधि बिक्री वितरण गर्न दिने स्वीकृती (अनुमतिपत्र) प्रदान गर्ने प्रक्रियामा गम्भीर अनियमितता गरेको, पहुँचको दुरुपयोग र ठूलो आर्थिक चलखेल भएकाले पूर्ण रुपमा छानविन नभएसम्म उक्त प्रक्रिया यथास्थितीमा राख्न माग गरिएको समाचार यसअघि हेल्थआवाजले प्रकाशित गरेको थियो ।
