नर्सिङ आन्दोलनः इमर्जेन्सीबाहेकका सेवा दुई घण्टा अवरुद्ध

काठमाडौं—सरकारीसरह पारिश्रमिकको माग गर्दै आन्दोलनरत निजी स्वास्थ्य संस्थाका नर्सहरुको मागमा ऐक्यबद्धता जनाउँदैं देशभरका नर्सहरुले इमर्जेन्सीबाहेकका सेवा दुई घण्टा अवरुद्ध पारेका छन् । बिहीबार उनीहरुले देशभरका अस्पतालहरुमा इमर्जेन्सीबाहेकका सेवा १० बजेदेखि १२ बजेसम्म दुई घण्टा अवरुद्ध पारेका हुन् ।

नेपाल नर्सिङ संघको अगुवाईमा निजी अस्पताल तथा स्वास्थ्य संस्थामा कार्यरत नर्सहरुको सरकारीसरह पारिश्रमिक माग गर्दै नर्सहरु सशक्त आन्दोलन सुरु गरेका छन् । सुरुमा निजी मेडिकल कलेजहरुबाट सुरु भएको पारिश्रमिक सम्बन्धी नर्स र स्वास्थ्यकर्मीहरुको यो आन्दोलन अहिले देशव्यापी बनेको छ ।

निजी सवास्थ्य संस्थामा कार्यरत नर्सहरुको पारिश्रमिकको आन्दोलनमा ऐक्यबद्धता जनाउँदैं सरकारी अस्पतालमा नर्सहरुले प्रदर्शन सुरु गरेका छन् । कतिपय निजी अस्पतालका नर्सहरु प्रदर्शनमै उत्रिएका छन् भने कतिपय अस्पतालका नर्सहरुले कालोपट्टी बाँधेर काम गरिरहेका छन् ।

बुधबार नेपाल नर्सिङ संघले विज्ञप्ती जारी गर्दै स्वास्थ्य तथा जनसंख्या मन्त्रालय निरन्तर समाधानतर्फ लागिरहेतापनि मागको सम्बोधन हुन नसकेको उल्लेख छ । संघले जायज मागहरु पूर्ण रुपमा सम्बोधन नभएसम्म आन्दोलन जारी राख्ने जनाएको छ ।