मेलबर्न—अष्ट्रेलियाका मेलबर्नमा दुई जना नेपाली नर्सहरुको सडक दुर्घटना मृत्यु भएको छ । बिहीबार उत्तरी मेलबर्नको ह्युम फ्रीवेमा घाइते कंगारुलाई उद्धार गर्न खोज्दा कारको ठक्करबाट उनीहरुको मृत्यु भएको अष्ट्रेलियाका सञ्चारमाध्यमहरुले जनाएका छन् ।
मेलबर्नको बेभेरिज र थोमास्टाउनमा बस्दैं आएका ३० वर्षका सरला खड्का र अरिजा सुवाल अल्फ्रेड अस्पतालका नर्सहरु हुन् । उनीहरु दुवै जना एकदमै मिल्ने साथीहरु थिए । बिहीबार राति उनीहरु ह्युम फ्रीवेमा सँगै यात्रा गरिरहेका थिए, जहाँ उनीहरु अरिजाको ३० औं जन्मदिन मनाउन जाँदैं थिए ।
तर, बाटोमा उनीहरुले घाइते कंगारुलाई देखे र मद्धत गर्न गाडी रोके । यही क्रममा अध्यारोमा नदेखिएको अर्को गाडीले उनीहरुलाई ठक्कर दियो ।
रिपोर्टअनुसार एक जनाको घटनास्थलमै मृत्यु भएको थियो भने अर्कोको हेलिकप्टरमार्फत अस्पताल पुर्याइए पनि पछि उनको मृत्यु भएको थियो ।
सरला र अरिजा दुवै नेपालबाट अष्ट्रेलिया गएका थिए । दुई जना होनहार नर्सको मृत्युको खबरले नेपाली समुदाय गहिरो शोकमा डुबेको छ ।
अल्फ्रेड अस्पतालले आफ्ना सहकर्मीहरुको मृत्युबाट अपुरणीय क्षति पुगेको जनाएको छ ।
