कोरोना भाइरस प्रकोप : ‘डब्ल्यूएचओ’ ले लगायो विश्वव्यापी स्वास्थ्य संकटकाल

काठमाडौं – कोरोना भाइरसको प्रकोप विश्वभर फैलन थालेपछि विश्व स्वास्थ्य संगठन (डब्ल्यूएचओ)ले विश्वव्यापी स्वास्थ्य संकटकाल घोषणा गरेको छ । कमजोर स्वास्थ्य प्रणाली भएका देशहरुमा यसको प्रकोप महामारीका रुपमा फैलिन सक्ने जनाउँदै डब्ल्यूएचओले विश्वव्यापी रुपमा संकटकाल घोषणा गरिएको जनाएको छ ।

चीनमा के भईरहेको छ भन्दा पनि अरु देशमा के भईरहेको छ भन्नेमा बढी केन्द्रित रहेको (डब्ल्यूएचओ)का प्रमुख टेड्रोस अडनोम गेब्रियसले बताए । ’यस घोषणाको मुख्य कारण चीनमा के भइरहेको छ भन्ने होइन तर अन्य देशहरुमा के भइरहेको छ, थप प्रसारलाई सिमित गर्न हामी सबैले अबसँगै काम गर्नुपर्दछ,’ उनले भने, ’चिन्ता यो छ कि यो कमजोर स्वास्थ्य प्रणाली भएका देशहरुमा फैलिन सक्छ ।’ नेपालको कुनै पनि तयारी नदेखिएका कारण बढी जोखिममा पर्ने देखिएको छ ।

चीनको हुबेइ प्रान्तको वुहान शहरमा गएको डिसेम्बरमा पहिलोपटक देखिएको कोरोना भाइरसको संक्रमण हाल कम्तिमा १८ देशमा पुगेको छ । विश्व स्वास्थ्य संगठनले यातायातलाई पूर्णरुपमा बन्द भने गर्नुनपर्ने बताएको छ । विश्व स्वास्थ्य संगठनले विश्वव्यापीरुपमा संकटकाल घोषणा गरेपछि नेपालले पनि शुक्रबार बैठक बसेर धारणा सार्वजनिक गर्ने भएको छ ।