पर्सामा थप ७ जनामा कोरोना पुष्टि, जिल्लामा मात्र १ सय ३ पुग्यो

जनकपुर –  प्रदेश न.२ को पर्सामा थप ७ जनामा कोरोना भाइरस संक्रमण पुष्टि भएको छ । नारायणी अस्पतालको पिसीआर ल्याबमा गरिएको परीक्षणमा थप ७ जनामा संक्रमण पुष्टि भएको हो । कालिकामाई गाउँपालिकामा ४ जना, सखुवाप्रसौनी गाउँपालिकामा २ जना र विन्दबासिनी गाउँपालिकामा १ जनामा कोरोना संक्रमण पुष्टि भएको अस्पताल स्रोतले जनाएको छ ।

संक्रमितहरु सबै क्वारेन्टिनमै रहेका छन् । संक्रमितहरु १६ देखि ४९ वर्षसम्मका रहेका छन् । सबै संक्रमित पुरुषहरु छन् । विन्दबासिनी गाउँपालिकाका संक्रमितलाई राति नै नारायणी अस्पताल मातहतको गण्डक कोभिड अस्पतालमा ल्याइएको छ भने अन्यलाई ल्याउने क्रम जारी छ ।

यसअघि नै ५० बेड आइसोलेसन क्षमता भएको गण्डक अस्पतालमा २३ जना संक्रमित उपचारत थिए । पर्साका प्रमुख जिल्ला अधिकारी ललित कुमार बस्नेतका अनुसार भारतबाट आएका, कन्ट्याक्ट ट्रेसिङमा परेर स्वाब संकलन गरिएको र अन्य शंकास्पद संक्रमितलाई क्वारेन्टिनमा राख्ने गरिएको छ । योसंगै पर्सामा १ सय ३ जना संक्रमित भएका छन् । सबै संक्रमितको स्वास्थ्य अवस्था सामान्य रहेको प्रमुख जिल्ला अधिकारी बस्नेतले बताए ।